თურქეთმა ფარმაცევტულ პროდუქტებზე ახალი ტარიფები დადგინდა — ბრძანება თურქეთის პრეზიდენტის რეჯეფ თაიფ ერდოღანმა ივლისის შუა რიცხვებში გამოსცა. აქამდე მოქმედი ბრძანების გადახედვის საჭიროება თურქული ლირის გაუფასურებიდან გამომდინარე დადგა. 

აღნიშნულმა განახლებამ გაზარდა ფარმაცევტების მოგება 100 ლირამდე ღირებულების მედიკამენტებიდან 25%-დან 28%-მდე, ხოლო 200 ლირაზე მეტი ღირებულების მედიკამენტებიდან 12%-დან 13%-მდე. მოგების ზრდამ ვერ დააკმაყოფილა თურქეთის ფარმაცევტების მოთხოვნები, სადაც ოფიციალური მონაცემებით, ივლისში ინფლაცია 79,60%-მდე გაიზარდა. აქედან გამომდინარე ფარმაცევტების დიდი ნაწილი თურქეთში მოგების დაბალ მარჟას აპროტესტებს.

თურქეთის მთავრობის გადაწყვეტილებას გარკვეული შეშფოთება მოყვა საქართველოშიც, სპეციალისტების ნაწილი  მიიჩნევდა, რომ თურქეთიდან შემოტანილი მედიკამენტების დიდი ნაწილი აგვისტოდან უკვე 30%-ით გაიზრდებოდა.

„ფარმაცევტთა ასოციაციის“ აღმასრულებელი დირექტორი ილონა კოკიაშვილი „კომერსანტთან“ ამბობს, რომ აღნიშნული გადაწყვეტილება ქართულ ბაზარზე თურქეთიდან შემოტანილ მედიკამენტებზე ჯერ კიდევ არ ასახულა, თუმცა ერთი თვის წინ ამის რეალური მოლოდინი არსებობდა.

„თურქულ მედიკამენტებზე დაბალი ფასები შენარჩუნებულია. ამ ეტაპისთვის მხოლოდ უმნიშვნელო ცვლილება შეინიშნება, რაიმე განსაკუთრებული ზრდა ან მედიკამენტების დეფიციტი არ არის. რაც მთავარია იზრდება არეალი, ყველა კომპანია ცდილობს რომ გეოგრაფიულად გაზარდოს მედიკამენტების მომარაგება და სრულად დაიფაროს საქართველო“, — აღნიშნავს ილონა კოკიაშვილი.

თურქეთიდან იაფი მედიკამენტების იმპორტი ექვსი თვის წინ დაიწყო, დღეისათვის კი საქართველოს სააფთიაქო ქსელებში ხელმისაწვდომია თურქეთიდან იმპორტირებული 400-ზე მეტი დასახელების მედიკამენტი. მედიკამენტებზე ფასები თავდაპირველი ღირებულებიდან 60% − 80%-მდე არის შემცირებული.