თურქული ლირა ვარდნას განაგრძობს. Bloomberg-ის სავაჭრო პლატფორმაზე, 22 ოქტომბერს, თბილისის დროით 15:00 სთ-ზე 1 აშშ დოლარის ღირებულებამ 9.6 ლირას გადააჭრბა, რაც თურქეთის ეროვნული ვალუტისთვის მორიგი ანტირეკორდია. ბოლო ორ კვირაში ლირა დამატებით 7%-ით გაუფასურდა, ბოლო ერთ თვეში 11%-ით, წლის დასაწყისიდან დღემდე კი 29%-ით. 1-ელ იანვარს კურსი 7.4-ს შეადგენდა.

ლირისგან განსხვავებით ლარი ჯერჯერობით პოზიციებს ინარჩუნებს. ივნისიდან მოყოლებული ის 3.10-3.15-ის ფარგლებში მერყეობს. სხვა თანაბარ პირობებში მეზობელი ქვეყნის ვალუტის გაუფასურება ლარის კურსზე არ უნდა მოქმედებდეს, მაგრამ წინა წლების გამოცდილება საპირისპიროს ამტკიცებს, რა დროსაც ლირის ვარდნის შემდეგ ლარიც უფასურდებოდა ხოლმე. თეორიულად ლირის ვარდნას თურქული იმპორტის გაიაფება და შესაბამისად თურქეთიდან იმპორტის მოცულობის ზრდა უნდა მოჰყვებოდეს, თურქეთში ქართულ ექსპორტს კი ამცირებდეს.

1-ელ იანვარს ლირა 44 თეთრი ღირდა, 22 ოქტომბრის ოფიციალური კურსი 34 თეთრს შეადგენს, მიმდინარე კურსი 33 თეთრზე ნაკლებია.

საქართველოს ფულად გზავნილებში თურქეთი მე-7 ადგილს იკავებს. სექტემბერში თურქეთიდან საქართველოში $9.9 მლნ, წლის პირველ 8 თვეში კი $79 მლნ გადმოირიცხა. გზავნილებში მისმა წილმა 4.7% შეადგინა. ლირის ვარდნა გზავნილის მოცულობას ამცირებს. თუ იანვარში 1000 ლირა 440 ლარი იყო, დღეს 340 ლარზე ნაკლებია.

უკვე მეხუთე წელია ძველი მოკავშირეების, თურქეთისა და აშშ-ის ურთიერთობა კრიტიკულ ფაზაშია გადასული. ვაშინგტონი ანკარას გიულენის გადაცემაზე უარს უცხადებს, თურქეთის მიერ რუსული საზენიტო რაკეტების С400-ების შესყიდვის შემდეგ პენტაგონმა თურქეთისთვის მეხუთე თაობის მრავალფუნქციური გამანადგურებლების F35 გადაცემაზე უარი განაცხადა. ანკარის გაღიზიანებას სირიაში აშშ-ის მიერ ქურთების მხარდაჭერაც იწვევს. ობამას დროს გაჩენილი ბზარი, ტრამპისა და  ბაიდენის დროს უფრო გაფართოვდა.