საქართველოში პირველი სახელოვნებო პარტნიორობის პლატფორმა „ტვიფრი“ ახალ პროექტს იწყებს. კომპანია გრაფიკულ დიზაინერ ივა ჯანეზაშვილთან ერთად საქართველოს მეფეების საკოლექციო მედლებს დაამზადებს. სერიის პირველ, საკოლექციო მედალზე „ვახტანგ გორგასალი“ იქნება გამოსახული, რომლის გამოშვება 2022 წლის ზაფხულში იგეგმება.

ანტიკური დაძველებით შესრულებულ საკოლექციო მედალში გაერთიანებულია ლეგენდარული ქართველი მეფის სახე, სიმბოლოები, ბრწყინვალება და ცნობილი ბრძოლა სპარსელებთან. როგორც „ტვიფრი“-ში ამბობენ, მედალზე დატანილ თითოეულ დეტალს სიმბოლური დატვირთვა აქვს, მასზე დატანილი წარწერები შესრულებულია შრიფტით, რომელიც თემესტიას წარწერებისა და ბოლნისის სიონის წარწერების მიხედვით შეიქმნა.

მედლის ავერსზე აბჯარასხმული მეფე ვახტანგ გორგასალია გამოსახული. ვახტანგ მეფეს მარჯვენა ხელში ხმალი აქვს აღმართული ჯვრის გამომსახველობითი ფორმით, როგორც წმინდანად შერაცხილი მეფე. გორგასალს მარცხენა ხელზე შევარდენი უზის და თბილისის დაარსების ცნობილ ლეგენდას გამოსახავს. მედლის რევერსზე სპარსელებთან ბრძოლის კომპოზიციაა წარმოდგენილი.

მათი ინფორმაციით, სერიის პირველი საკოლექციო მედალი ლიეტუვის ზარაფხანაში ლიმიტირებული რაოდენობით, მხოლოდ 500 ერთეული მოიჭრება. საკოლექციო დანიშნულების მედლის წინასწარი შეკვეთების მიღება (პრეორდერი)2022 წლის 10 მაისს დაიწყო და 24 მაისის ჩათვლით გაგრძელდება.

საკოლექციო მედლის იკონოგრაფია მხატვარ-ილუსტრატორს, სამხატვრო აკადემიის პროფესორს მამუკა მიქელაძეს ეკუთვნის. მედალზე ისტორიკოსმა, დოქტორმა ლადო მირიანაშვილმა იმუშავა. ორიგინალური შრიფტის ავტორია დავით მაისურაძე.

გეტყვით, რომ პროექტი „ტვიფრი“ პირველი სახელოვნებო პარტნიორობის პლატფორმაა საქართველოში, რომელიც ქართული წარმოების სამახსოვრო და საკოლექციო მედლების შექმნაზე მუშაობს. მზადდება როგორც საკოლექციო, ასევე საიუბილეო თემატიკის მედლები და მთავარი იდეა არის ქართული დამწერლობის, ისტორიული და კულტურული მემკვიდრეობების პოპულარიზაცია და მეტალში გაცოცხლება.