ბათუმის საკონტეინერო ტერმინალში ტვირთების გახსნა შეფერხებით მიმდინარეობს, რის გამოც ავტოიმპორტიორებს, ვადაზე მეტხანს კონტეინერების დაყოვნების გამო, ჯარიმების გადახდა უწევთ.
ბათუმის საერთაშორისო საკონტეინერო ტერმინალი შეფერხებასთან დაკავშირებით პირველ კომენტარს ავრცელებს და განმარტავს, რომ ტვირთბრუნვის უეცარი ზრდა დაემთხვა ტერმინალზე მიმდინარე სიმძლავრეების გაზრდის ახალ პროგრამას.
„კომერსანტი“ ბათუმის საერთაშორისო საკონტეინერო ტერმინალის (BICT) პრეს-რელიზს უცვლელად გთავაზობთ:
„გაზრდილი დატვირთულობის მიუხედავად, ბათუმის საერთაშორისო საკონტეინერო ტერმინალი (BICT) ატარებს სხვადასხვა ღონისძიებებს იმისათვის, რომ უზრუნველყოს მომსახურების ჩვეული მაღალი ხარისხის მიწოდება.
პანდემიის მთელი პერიოდის განმავლობაში და მას შემდეგაც, მიუხედავად რთული საბაზრო პირობებისა, BICT-მ შეინარჩუნა მაღალი სტანდარტი, მაშინ როდესაც მრავალი სხვა ტერმინალი რეგიონში იყო გადატვირთული.
ტვირთბრუნვის უეცარი ზრდა დაემთხვა ტერმინალზე მიმდინარე სიმძლავრეების გაზრდის ახალ პროგრამას, რომელიც გულისხმობს დამატებითი სასაწყობე ტერიტორიის მოწყობას, დამატებითი ტექნიკისა და ინფრასტრუქტურის შეძენასა და მოწყობას. ბსსტ-ს განცხადებით, აღნიშნული პროგრამის განხორციელება სატერმინალო პროცედურების გამარტივებას, დაჩქარებასა და მომსახურების მაღალეფექტიანი დონის შენარჩუნებას ემსახურება“, - წერია პრესრელიზში.
„ვაფასებთ კლიენტების გვერდით დგომას, რომლებიც მხარს გვიჭერენ უეცრად გაზრდილი ტვირთბრუნვის პირობებში. გამტანუნარიანობის გაზრდის ახალი პროგრამა, გადადგმული ნაბიჯები და ავტოიმპორტიორებთან მჭიდრო თანამშრომლობა კოორდინირებულად მომსახურების საუკეთესო შესაძლო შედეგის მისაღწევად, დარწმუნებული ვართ, პოზიტიურ შედეგს გამოიღებს და ეს მოულოდნელი და არასტანდარტული სიტუაცია ყველა მხარის სასარგებლოდ მოგვარდება“,- ამბობს ბსსტ-ს მმართველი დირექტორი ნიკოლოზ გოგოლი.