მიმდინარე თვეში ,,თოლია“ ვაკის პარკში ახალ სანაყინეს ხსნის. წელს ეს რიგით მესამე სანაყინეა. გარდა ახალი ობიექტისა, „თოლიამ“ გაყიდვებში რამდენიმე ახალი გემოს ნაყინი ჩაუშვა. როგორც ,,თოლიას“ გაყიდვების დეპარტამენტის ხელმძღვანელი სანდრო ლომთაძე ამბობს, ასორტიმენტს დაემატება ახალი პროდუქტები: ცივი და ცხელი ყავა, მაფინები და სხვადასხვა დასახელების ნამცხვარი, რომელთა შეძენას მალე ნებისმიერ სანაყინეში შეძლებს მომხმარებელი.
მიიღე ინფორმაცია უფრო სწრაფად „კომერსანტის“ Telegram-ზე.
ასორტიმენტის ზრდასთან ერთად, მოიმატა ნაყინის ფასმაც, რასაც ლომთაძე წარმოების გაზრდილ ხარჯს უკავშირებს. ,,თოლიას“ პროდუქცია საშუალოდ 12%-ით გაძვირდა. ცვლილება ყველა დასახელების ნაყინს შეეხო.
„თოლიას“ საქმიანობა ნაყინის ბაზარზე შეგვიძლია დავყოთ 2 ძირითად მიმართულებად, ეს არის: ინდუსტრიული ნაყინი და „თოლიას“ სანაყინეების ქსელი. ამ ორივე მიმართულებაში გვაქვს სიახლეები. ინდუსტრიული ნაყინის მიმართულებით, ასორტიმენტში დამატებულია მარწყვის ახალი გემო, ასევე პრემიუმ კლასის ნაყინის ,,ინდიგოს“ ორი ახალი გემო — ნუშისა და თხილის ნაყინები. ამასთან, აქტიური მიმართულებაა ჯაფის ფორმატის ,,თოლიას“ სანაყინეები, რომელიც წელს თავისუფლების მოედანზე და ვაკეში ჭავჭავაძის გამზირზე გაიხსნა. ძალიან მალე განახლებული სანაყინე დაახლოებით სამ კვირაში გაიხსნება ვაკის პარკში. სანაყინეებში ასევე ახალი პროდუქტები დაემატა, ცხელი ყავა და ძალიან მალე უკვე სხვადასხვა დასახელების ნამცხვარი და მაფინები“, - ამბობს სანდრო ლომთაძე ,,კომერსანტთან“.
რაც შეეხება გლობალური პროცესების გავლენას, მისივე ინფორმაციით, ეს არის გაძვირებული ნედლეული, რის გამოც კომპანიაში ფასების კორექტირება მოახდინეს.
,,სხვადასხვა დასახელებაზე განსხვავებული პროცენტული მაჩვენებლით შეიცვალა ფასი, საშუალოდ ეს არის 12%-იანი ზრდა, რაც ძირითადად თვითღირებულების გაზრდილ ხარჯს უკავშირდება. ეს გამოიწვია ნედლეულის გაძვირებამ, რის გამოც იძულებული გავხდით, პროდუქტი გაგვეძვირებინა, ფასების შენარჩუნება შეუძლებელი გახდა. ჩვენ უკვე შესყიდული გვქონდა ნედლეული და ამ ეტაპზე უშუალოდ ომის გამო პრობლემა არ შეგვქმნია. იმპორტიც მეტნაკლებად დივერსიფიცირებულია, რაც მთავარია, რუსეთი არ არის მომწოდებელი, რაც სტაბილურობის მეტ გარანტს წარმოადგენს“, - აცხადებს სანდრო ლომთაძე.
შეგახსენებთ, რომ ,,თოლია“ ქართულ ბაზარზე 25 წელია ოპერირებს და ლიდერ პოზიციაზეა - ბაზრის 57% უჭირავს. კომპანია 68 დასახელების ნაყინს უშვებს.
რაც შეეხება სანაყინე ხაზს, საქართველოს მასშტაბით ფილიალების რაოდენობა 25-ს შეადგენს. თბილისის გარდა, ,,თოლიას“ სანაყინეები მუშაობენ ბათუმსა და ქუთაისში.
კომპანიაში 450-მდე ადამიანია დასაქმებული.
მარი ჩიტაია