ადგილობრივი თვითმმართველობის არჩევნების ორივე ტური სახელმწიფო ბიუჯეტს დაახლოებით 56 მილიონი ლარი უჯდება.
საკანონმდებლო მაცნეზე გამოქვეყნებული დადგენილების თანახმად, 30 ოქტომბერს დაგეგმილი მეორე ტურისთვის ცენტრალურმა საარჩევნო კომისიამ (ცესკო) 11.7 მილიონ ლარამდე გამოყო. აქედან შრომის ანაზღაურებაზე გამოყოფილი თანხა 7.1 მილიონს, მომსახურებაზე 3 მილიონს, ხოლო სხვა ხარჯები 1.5 მილიონ ლარს შეადგენს.
რაც შეეხება არჩევნების პირველ ტურს, 2 ოქტომბრის არჩევნების ორგანიზება-ჩატარებაზე ცესკოს ბიუჯეტიდან 44.1 მილიონი ლარი დაიხარჯა.
არჩევნების მეორე ტური, 30 ოქტომბერს ხუთ თვითმმართველ ქალაქში: თბილისში, ფოთში, რუსთავში, ქუთაისში, ბათუმში და 15 თვითმმართველ თემში გაიმართება. მაჟორიტარული სისტემით არჩევნების მეორე ტური გაიმართება, ასევ 24 საარჩევნო ოლქში. თბილისის მერობისთვის ქართული ოცნების კანდიდატი კახა კალაძე და ნაციონალური მოძრაობის კანდიდატი ნიკა მელია იბრძოლებენ.
ექსპერტები ამბობენ, რომ არჩევნების გაციფრულებით ბიუჯეტი მილიონობით თანხას დაზოგავს. მათი განმარტებით, არჩევნების გაციფრულება მის ბლოკჩეინ სისტემით ჩატარებას გულისხმობს. ბლოკჩეინ არჩევნები ყველაზე დემოკრატიულ არჩევნებადაა აღიარებული, თუმცა მისი დანერგვა საქართველოს საარჩევნო სისტემაში, როგორც ჩანს, არც ხელისუფლებას სურს და არც ოპოზიციას.
ციფრული ეკონომიკის მესვეურები და ტრადიციული ეკონომიკის სპეციალისტები დიდი ხანია საუბრობენ, რომ ბლოკჩეინ სისტემის ამოქმედებით არჩევნების გაყალბების შანსი ნულს უტოლდება და გამოათავისუფლებს საარჩევნო ხარჯს, რომელიც ყოველწლიურად იზრდება. მათივე რეკომენდაციით, ეს მოგვცემს შესაძლებლობას დაზოგილი მილიონები მივმართოთ ბევრად საჭირო პროგრამებზე, როგორიცაა სოციალური პროგრამები, საგანმანათლებლო და სხვა, რაც ქვეყნის ეკონომიკას ბევრად მეტ სარგებელს მოუტანს.
ციფრული არჩევნები კიდევ უფრო მიმზიდველი ხდება პანდემიისას, რადგან ხმის მისაცემად ხალხის მობილობა არ იქნება საჭირო, რაც კორონავირუსის გავცელების რიკს არჩევნების მიზეზით ნულამდე დაიყვანს.
ექსპერტების მტკიცებით, მხოლოდ ციფრული არჩევნებით იქნება გარანტირებული დემოკრატიულობის მაღალი ხარისხი და, რაც მთავარია, ყველაზე ეკონომიურიც. გარდა იმ სიკეთისა, რომ ბლოკჩეინ არჩევნებში ანულირდება საარჩევნო ხარჯი, რითაც ბიუჯეტი სოლიდურ თანხას დაზოგავს, ექსპერტების თქმით, ციფრულ არჩევნებში ჩართვა შეეძლებათ ემიგრანტებსაც, აფხაზ და ოს ძმებსაც, რაც ჩვენს ინეგრაციას შეუწყობს ხელს.
შეგახსენებთ, 2019 წლის პრეზიდენტის არჩევნები ქვეყნის ბიუჯეტს 55 მილიონი ლარი დაუჯდა. უშუალოდ საარჩევნო ღონისძიებებზე დაახლოებით 40 მილიონი ლარი დაიხარჯა. დანარჩენი 15 მილიონი კი, ბიუჯეტს პოლიტიკური პარტიების შენახვა დაუჯდა. ცესკომ 2020 წლის ოქტომბრის საპარლამენტო არჩევნების ჩასატარებლად 42,760,652 ლარი დახარჯა.
ავტორი: ბელა გელაშვილი.
წყარო: ბიზნეს ფორმულა