„ბუნებრივია წინა მოსამზადებელ სამუშაოებში ჩვენც ვიყავით ჩართულები, მალე დაიწყება თხილის მთლიანი კადასტრის რეესტრის შედგენა და როდესაც საგაზაფხულო სამუშაოები დაიწყება მოხდება პესტიციდებით მხარდაჭერა“- ამის შესახებ „კომერსანტს“ საქართველოს თხილის მწარმოებელთა ასოციაციის აღმასრულებელმა დირექტორმა გიორგი თოდუამ უთხრა. როგორც ცნობილია, დღეს 31 ოქტომბერს პრემიერ -მინისტრმა ირაკლი ღარიბაშვილმა თხილის სუბსიდირების პროგრამის დაწყება დააანონსა.
გიორგი თოდუა აღნიშნულ გადაწყვეტილებას დადებითად აფასებს და აცხადებს, რომ ასოციაცია მხარში დაუდგება სოფლის მეურნეობის სამინისტროს და თითოეულ ფერმერს იმისათვის, რომ ყველა სუბსიდია მიზნობრივად იქნეს დახარჯული.
„მე რა ინფორმაციაც მაქვს დაიწყება თხილის მთლიანი კადასტრის რეესტრის შედგენა, რაც ადრე არ არსებობდა. ბუნებრივია ასოციაციას მუნიციპალიტეტების მიხედვით გვქონდა მონაცემები თუ სად რომელ ფერმერს რამდენი თხილის ბაღი გააჩნდა, ასევე ასოციაცია წინა მოსამზადებელ სამუშაოებშიც იყო ჩართული, თუმცა პირველ ეტაპზე ჩვენც და სახელმწიფომაც დაზუსტებით უნდა ვიცოდეთ თუ რამდენი თხილის ბაღია მუნიციპალიტეტების მიხედვით.
მეორე ეტაპზე, ანუ როდესაც საგაზაფხულო სამუშაოები დაიწყება მუნიციპალიტეტების მიხედვით დაგეგმილია პესტიციდების მიწოდება, ძალიან კარგია, რომ მწარმოებლებისთვის თხილი დასუბსიდირდება. ჩვენ ამას დადებითად ვუყურებთ და მხარში დავუდგებით სოფლის მეურნეობის სამინისტროს, თითოეულ ფერმერს, რათა გაკონტროლდეს და თითოეული სუბსიდია მიზნობრივად იქნეს დახარჯული,“ - აღნიშნა გიორგი თოდუამ.
თოდუამ „კომერსანტთან“ წლევანდელი ექსპორტიც შეაფასა და განმარტა, რომ თხილი ძირითადა ევროპულ ქვეყნებში გადის. მათ შორის ლიდერი იტალია და გერმანიაა, რაც შეეხება ფასს, გიორგი თოდუა აცხადებს, რომ წინა წელთან შედარებით წელს თხილის ფასი დაბალია.
„წლევანდელი ექსპორტი დაწყებულია, ძირითადად ევროპული ქვეყნებია, მათ შორის ლიდერია იტალია გერმანია, თუმცა არის სხვა ქვეყნებიც. თხილის ფასი წინა წელთან შედარებით გაცილებით დაბალია, სწორედ ამან განაპირობა სუბსიდირების პროგრამა და ძალიან კარგია, რომ სახელმწიფო ინტერესდება და ფერმერებს მხარს უჭერს. ასევე აღსანიშნავია ისიც, რომ წელს ივნისი-ივლისის უხვი ნალექის გამო თხილის ხარისხი დაბალია. 2019-2020-2021 გამორჩეული იყო და 120 – 130 მილიონი დოლარის და მეტის შემოსავალი მივუღეთ, წელს ხარისხმა და რაოდენობამ იკლო, ამიტომ თხილის სეზონში სუბსიდირება მისასალმებელია“, - აღნიშნა გიორგი თოდუამ.
გარემოს დაცვისა და სოფლის მეურნეობის მინისტრი ოთარ შამუგია განმარტავს, თუ რა შემთხვევაში შეუძლიათ ფიზიკურ პირებს თხილის წარმოების ხელშეწყობის მიზნით ამოქმედებულ სუბსიდირების პროგრამაში მონაწილეობის მიღება.
როგორც მთავრობის სხდომის დასრულების შემდეგ შამუგიამ განაცხადა, ყველა ფიზიკური პირი, რომელსაც 0.2 ჰა-დან 3 ჰა-მდე თხილის ფართობი აქვს, თითოეულ ჰექტარზე 500 ლარის დახმარებას მიიღებს. მინისტრის განმარტებით, აღნიშნული თანხა აგრობარათებზე ქულების სახით დაერიცხებათ.
პროგრამისთვის პირველ ეტაპზე 20 მილიონი ლარი გამოიყოფა.
თაკო კვაჭანტირაძე