„უახლოეს ერთ თვეში, ფასების მკვეთრ რყევებს არ ველოდებით, რადგან სიტუაცია მეტნაკლებად დადასტურებულია“ - ამის შესახებ რადიო „კომერსანტის“ გადაცემაში „კომერსანტის დილა“ საქართველოს დისტრიბუტორთა ბიზნეს ასოციაციის პრეზიდენტმა ივა ჭყონიამ ისაუბრა. მისი თქმით, უკვე ჩამოყალიბებულია თუ რა დრო სჭირდება გადაზიდვებს და რა ფასებში ხდება, ასევე საერთაშორისო ბაზარზეც რიგ ნედლეულზე ისევე როგორც ნავთობზე ფასები დასტაბილურდა და იაფდება.
„ვიმედოვნებ, რომ ფასების კლება ბრენდულ სუპერმარკეტებშიც მალე აისახება. რა თქმა უნდა ფასების კლება პირველ ეტაპზე საბითუმო ბაზარს ეტყობა, ხოლო ქსელურ და ბრენდულ სუპერმარკეტებში მოგვიანებით გადადის.
ზოგადად რამდენადაც ფასის გაძვირება რთულია და ეს ერთ დღეში არ ხდება, იმდენად ფასდაკლებასთან დაკავშირებითაც პროცედურებია გასავლელი, ამიტომ ფასებთან დაკავშირებით სტაბილურობას ველოდებით, საგანგაშო არაფერი არ გვაქვს.
სეზონურობიდან გამომდინარე ხილზე და ბოსტნეულზე ფასები რიგ შემთხვევაში მაღალია, რიგ შემთხვევაში მცირდება. ამ არასტაბილურმა ვითარებამ ნედლეულზე ფასების ზრდა გამოიწვია, მაგალითად მიწის დამუშავების პერიოდში ფერმერებისთვის დიზელის ფასი საკმაოდ გაძვირდა და 4,50-დან 4,70-მერყეობდა. სწორედ ამიტომ მივიღეთ ის, რომ ბოსტნეულის ფასი 30-დან 35%-მდე არის გაზრდილი. ამის ერთ-ერთი გამომწვევი მიზეზი არის ისიც, რომ გლობალურად გაძვირებულია სასუქები და სათესლე მასალა. გამომდინარე იქიდან, რომ ამ კუთხით იმპორტზე ვართ დამოკიდებული ფერმერები იძულებული გახდნენ ფასი გაეზარდათ“, - აღნიშნა ივა ჭყონიამ.
ჭყონიას თქმით, მიუხედავად იმისა, რომ ბოლო პერიოდი შედარებით სტაბილურია მაინც იმდენად ბევრი იხარჯება პროდუქტებზე, რომ ეს არც იგრძნობა, რადგან თუ მაგალითად თუ პირობითად წიწიბურა ღირდა 6 ლარი და დღეს ღირს 5,80 ლარი ეს მომხმარებლისთვის შვება ნამდვილად არ არის.
ჭყონიას თქმით, მიწოდების ჯაჭვის მიმართულებით, დღეს არანაირი პრობლემა არ არის. მან ასევე აღნიშნა, რომ პირველ ეტაპზე, როდესაც რუსეთის უკრაინის მიმართ აგრესია საწყის ეტაპზე იყო და ტრანსპორტირების გადალაგება ხდებოდა დაბნეულობა იყო, რადგან იყო როგორც საქართველო დერეფანი და ქვეყანა რთულ მდგომარეობაში აღმოჩნდა.
„ამ პერიოდში ტრანსპორტირებაზე ფასის ზრდამ პროდუქციის თვითღირებულება გაზარდა, შესაბამისად ინფლაციის ორნიშნა მაჩვენებელი მივიღეთ და ეს ძალიან ცუდი ციფრია. წლიურ ჭრილში 11,5% ძალიან მაღალია, თუმცა აქვე შეგვიძლია ვისაუბროთ იმაზე, რომ თვიურ ჭრილში რიგ პროდუქტებზე ინფლაციის მაჩვენებელი სტაბილურია და პირველადი მოხმარების პროდუქტების, მაგალითად ზეთის და ფქვილის ფასი შედარებით დასტაბილურდა და ქვევითაც მოდის, თუმცა სხვადასხვა პროდუქტებში იმდენად დიდი დისბალანსია, რომ ინფლაციის მაჩვენებელი კვლავ მაღალია“, - ანიშნა ივა ჭყონიამ.
თაკო კვაჭანტირაძე