„უახლოეს პერიოდში უნდა ველოდოთ შუააზიური ტვირთების გაზრდას, რაც პირდაპირ კავშირშია ახალი რეგიონული სავაჭრო–ლოგისტიკური ცენტრების განვითარებასთან“, - ამის შესახებ „კომერსანტს“ ფოთის თიზ-ის გენერალურმა დირექტორმა დავით ებრალიძემ უთხრა.

მიიღე ინფორმაცია უფრო სწრაფად „კომერსანტის“ Telegram-ზე.

დავით ებრალიძის თქმით, რუსეთ-უკრაინის ომმა ფოთის თიზ-ში არსებული კომპანიების მუშაობაზე მნიშვნელოვანი გავლენა მოახდინა.

„რუსეთ-უკრაინის ომმა, რა თქმა უნდა,  გავლენა მოახდინა ფოთის თიზ-ში რეგისტრირებული კომპანიების საქმიანობაზე. განსაკუთრებით ხელის შემშლელი აღმოჩნდა ისეთი კომპანიებისთვის, რომელთა საქმიანობა პირდაპირ თუ ირიბად დაკავშირებული იყო უკრაინისა და რუსეთის ბაზარებთან. შეფერხდა ნედლეულის მოწოდების პროცესი, რომელმაც გამოიწვია საწარმოო ციკლის შენელება, თუმცა კომპანიები ცდილობენ ახალი მომწოდებლების პოვნას. ომმა პირდაპირი გავლენა იქონია ექსპორტზე, რომლის შედეგად თითქმის შეწყდა ტვირთის მიწოდება უკრაინაში და რუსეთში. გარდა ამისა, ომით გამოწვეულმა სატრანსპორტო შეზღუდვებმა გავლენა იქონია ტრანსპორტირების საფასურზე, რომელიც მკვეთრად გაიზარდა და ცალსახად ნეგატიურად აისახა ზოგადად ყველა კომპანიის ბინზეს საქმიანობაზე“, - განმარტა ებრალიძემ.

ფოთის თიზ-ის გენერალური დირექტორი ამბობს, რომ შავ ზღვაში უკრაინისა და რუსეთის საზღვაო პორტების პარალიზებამ უმოკლეს ვადაში მკვეთრად გაზარდა აზერბაიჯანი-საქართველოს დერეფნით ტვირთების ბრუნვა.

„საქართველო ყოველთვის წარმოადგენდა ერთ-ერთ მნიშვნელოვან რგოლს მსოფლიო მიწოდების ჯაჭვში. უკრაინა-რუსეთის ომით გამოწვეული შეზღუდვები მალევე აისახა შავი ზღვის რეგიონში ტვირთების მოძრაობაზე. შავ ზღვაში უკრაინისა და რუსეთის საზღვაო პორტების პარალიზებამ ახალი გამოწვევა მისცა მსოფლიოს ალტერნატიული უსაფრთხო სატრანსპორტო კორიდორის გამონახვის მხრივ, რამაც უმოკლეს ვადაში მკვეთრად გაზარდა აზერბაიჯანი-საქართველოს კორიდორით ტვირთების ბრუნვა. უახლოეს პერიოდში უნდა ველოდოთ შუააზიური ტვირთების გაზრდას, რაც პირდაპირ კავშირშია ახალი რეგიონული სავაჭრო ლოგისტიკური ცენტრების განვითარებასთან. ფოთის თიზ-ი, თავისი სტრატეგიული მდებარეობით, გამარტივებული საბაჟო პროცედურებით, საგადასახადო შეღავათებით შესაძლებლობას აძლევს საერთაშორისო კომპანიებს, მოაწყონ და განავითარონ თავიანთი ლოგისტიკური, სასაწყობე ცენტრები, რაც შექმნის ახალ სამუშაო ადგილებს და გაზრდის ინვესტიციების მოცულობას“, - ამბობს დავით ებრალიძე.

ფოთის თიზი 2009 წელს ფოთში, ნავსადგურის ყოფილი ექსტენსიური განვითარების ზონის ტერიტორიაზე (300 ჰა), 99 წლის ვადით შეიქმნა. თიზ–ის ორგანიზატორი არაბული კომპანია „რაკია საქართველო თავისუფალი ინდუსტრიული ზონა“ იყო. დღეს შპს „ფოთის თავისუფალ ინდუსტრიულ ზონას“ ჰყავს სამი მესაკუთრე და ესენია: საქართველოს მთავრობა - 10%, არაბული კომპანია „რას ალ ხაიმას საინვესტიციო ორგანო“ (სახელმწიფო ორგანო) - 15% და ჩინური კომპანია შპს „სი ი ეფ სი“ (ევრო-აზიური) – 75 %.

ნინო თამაზაშვილი