რუსეთ-უკრაინის ომმა ევროპის გეოპოლიტიკურ რუკაზე ახალი გადანაწილების წინაპირობა შექმნა. ევროპარლამენტმა უკრაინის მხარდამჭერი რეზოლუცია უკვე დაამტკიცა. სად შეიძლება აღმოჩნდეს საქართველო და რა უნდა იყოს დღეს ქვეყნის მთავარი მიზანი, ამ თემაზე „კომერსანტთან“ საერთაშორისო მენეჯერმა, ფინანსისტმა და ვიდეო-ბლოგერმა ნიკოლოზ შურღაიამ ისაუბრა.
„საქართველო ორ ათეულ წელზე მეტია ადგას ევროპული ინტეგრაციის კურსს. ვფიქრობ ეს კურსი უალტერნატივოა, ანუ ყველა სხვა შესაძლებლობა და მიმართულება ბევრად უარესია.
ევროატლანტიკური ინტეგრაცია ნიშნავს:
- ეკონომიკურ კეთილდღეობას ბიზნესისთვის და მოსახლეობისთვის;
- ჯანსაღ ბიზნეს გარემოს და სამართლიან და ეფექტიანურ სამართლო სისტემას;
- მეტ უცხოურ ინვესტიციებს საქართველოში ბიზნესის და სოციალური განვითარებისთვის;
- უკეთეს სავაჭრო და მიგრაციის პირობებს;
- ჩვენი სოციალური და ეკონომიკური სტრუქტურის და ქცევის პროგნოზირებადობას, სანდოობას და გრძელვადიან მდგრადობას. ხაზგასმით აღვნიშნავ, რომ ზემოთ ჩამოთვლილი ჩვენი გასაკეთებელია, უპირველეს ყოვლისა. ანუ, სურვილი თუ არ გვექნა და სერიოზულ ძალისხმევა არ ჩავდეთ, ვერც ჩვენი სასამართლო სისტემა გახდება უფრო ეფექტიანი და სამართლიანი და ვერც ეკონომიკურ კეთილდღეობას შევიქმნით. ევროპელები დახმარებას კი გაგვიწევენ ტექნიკურადაც და მატერიალურადაც, მაგრამ ამ დახმარების გამოყენებით სერიოზული შედეგების მიღწევა სწორედ ჩვენი პასუხისმგებლობაა.
რა თქმა უნდა, ევროატლანტიკური ინტეგრაცია საქართველოსთვის საუკეთესო პირობებით არის საჭირო. ამავე დროს, ჩვენი პარტნიორების ნდობა ფუნდამენტური მნიშვნელობისაა. მათ არასოდეს უნდა გავუჩინოთ ეჭვი, რომ ჩვენ ვყოყმანობთ მიმართულებასთან დაკავშირებით, ან ჩვენი ღირებულებები ძირითადად არ ემთხვევა ევროპულს“, - აღნიშნავს ნიკოლოზ შურღაია.
მისი თქმით საქართველოს მიზანია ევროკავშირის წევრობა. შესაბამისად, უახლოესი წლების ამოცანად ევროკავშირის ქვეყნებთან ნდობის გაღრმავება მიაჩნია.
„ნდობა არის ფუნდამენტური საკითხი და ის იქმნება ისეთი პრაქტიკული მოქმედების საფუძველზე, რაც აჩვენებს ჩვენს ერთგულებას ევროკავშირის ღირებულებებთან - ეფექტიანიური სასამართლო სისტემა, კანონის უზენაესობა და შესრულება, დასახული მიზნების და პროგრამების შესრულება.
განსაკუთრებით მნიშვნელოვანია დიდ და გავლენიან ქვეყნებთან ნდობის ზრდა, ასევე პრაქტიკული ეკონომიკური საკითხების გადაწყვეტა: ექსპორტის ზრდის წახალისება, ეკონომიკური კავშირების გაფართოება, ჩვენი კანონმდებლობის მეტი ჰარმონიზაცია დასახული გეგმის მიხედვით, უკვე მიღებული კანონების შესრულება, ბუნების უკეთესი დაცვა და სხვა“, - განმარტავს ნიკოლოზ შურღაია.