უბნის მცირე მაღაზიების უმეტესობა გაქრობის პირასაა. ამის მიზეზი კონკურენციასთან დაკავშირებული პრობლემაა, რამაც განსაკუთრებით პანდემიისას იჩინა თავი და მაღაზიების გაკოტრება გამოიწვია. თუკი სუპერმარკეტები კლიენტებს პროდუქციის ფართო არჩევანს და წამახალისებელ აქციებს სთავაზობენ, უბნის მაღაზიების ამის მცირე რესურსიც არ აქვთ, გარდა „ნისიებისა“, რამაც ზოგიერთი მათგანი დღემდე მოიყვანა.
გლდანში სულ ახლახან ერთ–ერთი მინიმარკეტი დაიხურა. ობიექტის მფლობელი თამილა გოშაძე ამბობს, რომ სუპერმაკეტების ფონზე მუშაობა ძალიან გაუჭირდა და ბოლო დროს ვერც „ნისიამ“ გაამართლა:
„ჩვენ გარშემო 4 წამყვანი ბრენდის მსხვილი მარკეტი მუშაობს. ასეთ ფონზე გვიკვირს, რომ აქამდეც მოვედით. მათ ფასდაკლებები აქვთ, სხვადასხვა აქციები, ფართო ასორტიმენტი და მომხმარებელი ამის გამო ყოველთვის ჰყავთ. არავინ არ უყურებს იმას, რომ ფასდაკლებით გასაყიდი პროდუქტის გვერდით, „ცეცხლის ფასებია“ და ყველაფერი ლამის სამმაგ ფასში იყიდება. ბოლო დრომდე „ნისიამ“ გვამუშავა, შევინარჩუნეთ გაჭირვებული მომხმარებელი, მაგრამ სამაგიეროდ გაგვიჭირდა ფულის ამოღება. ასე გრძელდებოდა მთელი წლის განმავლობაში, ახალი პროდუქტის დამატებაც გაგვიჭირდა შემცირებული მოგების გამო, ამიტომ დახურვა ვარჩიეთ. ახლა ძირითადად ხილ-ბოსტანი ამართლებს. ჩვენს უბანში, საცხოვრებელი კორპუსების ქვემოთ სამ-სამი სურსათის მაღაზია მუშაობდა და ერთი დარჩა“, - ამბობს თამილა გოშაძე.
უბნის მაღაზიების პრობლემები ცნობილია ქართულ მაღაზიათა ასოციაციისთვის, რომელიც ასობით ასეთ მაღაზიას აერთიანებს. ასოციაციის თავმჯდომარის, სანდრო სუბელიანის თქმით, მაქსიმალურს აკეთებენ, რათა მაღაზიებს გადარჩენაში შეუწყონ ხელი, თუმცა არაკონკურენტუნარიან ბაზარზე მცირე სეგმენტისთვის პოზიციების შენარჩუნება დიდ სირთულეს წარმოადგენს.
„უბნის მაღაზიების დახურვის ტენდენცია შესამჩნევია. ჩვენ ვცდილობთ, რომ შევუწყოთ ხელი და გადარჩენაში დავეხმაროთ. თუმცა, ქვეყანაში შექმნილი ეკონომიკური მდგომარეობა ამის საშუალებას ხშირად არ იძლევა. მათი მოგება მცირდება, უკვე თავს ვერ ინახავენ და წაგებაზე მუშაობენ. ამის გამო ბევრი მაღაზია იკეტება. ამას ხელს უწყობს ფასების ზრდა, ინფლაცია და სხვა, განსაკუთრებით კი არაჯანსაღი კონკურენცია. ბაზარზე არასამართლიანი კონკურენტული გარემოა, სუპერმარკეტები ბევრად დაბალ ფასს ადებენ პროდუქციას, ფართო არჩევანი და შესაბამისად, მეტი რესურსი აქვთ, რომ მცირე მოთამაშეებს არაჯანსაღი კონკურენცია გაუწიონ, რაც შემდეგში მათ მუშაობაზე აისახება. მაღაზიების დახურვის ტენდენცია წლების წინ დაიწყო, თუმცა პანდემიისას ტემპი უფრო დაჩქარდა. ეს ბუნებრივია, ვინაიდან მცირე მოთამაშეები არიან, დამოუკიდებლად არ შეუძლიათ კონკურენციის დიდ ჯაჭვში ჩაბმა და გავლენის მოხდენა ბაზარზე“, - ამბობს სანდრო სუბელიანი „კომერსანტთან“ საუბარში.
მისივე თქმით, მსგავსი რისკის ქვეშ არის უბნის მაღაზიების უმეტესობა. შექმნილი ვითარებიდან სუბელიანი ერთადერთ გამოსავლად მიიჩნევს, რომ კონკურენტუნარიანი გარემო შეიქმნას და არ მოხდეს მათი უფლებების შელახვა, მთავრობის მხრიდან ნებისმიერი რეგულაციის მიღების დროს.
ცნობისთვის, ქართულ მაღაზიათა ასოციაცია 2018 წელს შეიქმნა და დღეისთვის 500-მდე მაღაზიას აერთიანებს.
მარი ჩიტაია