ქართველ ბრენდ-შეფებზე უცხოეთშიც დიდი მოთხოვნაა. რესტორატორთა ასოციაციის ხელმძღვანელი შოთა ბურჯანაძე „კომერსანტთან“ აცხადებს, რომ ქართული გასტრონომია პოპულარულია, როგორც საქართველოში, ასევე მის ფარგლებს გარეთაც და შესაბამისად ქართველ შეფებზე, რომლებიც ბევრნი არ არიან, უცხოეთის ბაზრებზე დიდი მოთხოვნაა.
„ჩვენს სფეროში არსებობს შეფი - ბრენდ შეფი, რომელიც ნიშნავს, რომ შესაძლოა სხვადასხვა რესტორნებში ქმნიდეს პროდუქტს და ქმნიდეს კერძს და მისი კერძი სხვადასხვა რესტორანში იყოს. ბრენდ შეფი საქართველოში ერთეულია და ეს ასეა არამარტო საქართველოში, არამედ სხვა განვითარებულ ქვეყნებშიც.
ასეთი ადამიანები საკმაოდ მოთხოვნადი არიან, იქიდან გამომდინარე, რომ ქართული გასტრონომია და ქართული კულინარია არამარტო საქართველოში, არამედ მის ფარგლებს გარეთაც წარმატებულია, ასეთ ადამიანებზე მოთხოვნაა.
ეს შეფები როგორც საქართველოში, ასევე უცხოეთშიც ქმნიან კერძებს და ზუსტად ესენი არიან ის ბრენდ შეფები, რომელთა კერძებიც სხვადასხვა ქვეყნების სხვადასხვა მენიუებშია, ქართულ რესტორნებში.
ასეთი ადამიანები არ არიან ათეულები, ერთეულები არიან. ჩვენ დღეს ვართ იმ საწყისზე, როდესაც ნელ-ნელა იზრდება პროცესი. ის ვითარება, რაც 15 წლის წინ გვქონდა სრულად შეცვლილია და მხოლოდ და მხოლოდ დადებითისკენ.
შეიძლება ითქვას, რომ კოვიდმა ძალიან დააჩქარა დადებითი ასპექტით ეს პროცესი, ხალხმა ზუსტად იგრძნო რა არის ამ სფეროსთვის საჭირო“ - აცხადებს ბურჯანაძე.
რესტორატორთა ასოციაციის ხელმძღვანელი ამბობს, რომ ქართველ ბრენდ შეფებზე მოთხოვნა ძირითადად ევროპაშია - გერმანიაში, ჩეხეთში, პოლონეთში და ასევე აშშ-ში, კერძოდ ნიუ იორკში.
შოთა ბურჯანაძე
