Bloomberg-ი წერს, რომ რუს ოლიგარქებს თავიანთი ბიზნესის საკუთრების სტრუქტურული კორექტირება უწევთ მას შემდეგ, რაც 16 აპრილს პუტინმა ხელი მოაწერა ბრძანებულებას უცხოურ საფონდო ბირჟებზე რუსული კომპანიების ლისტინგის გაუქმების შესახებ.
„ეს ნიშნავს, რომ რუსი მილიარდერები, როგორიც არის, მაგალითად, ვლადიმერ პოტანინი და რომლებიც უცხოეთში კოტირებულ კომპანიებს ფლობენ, ვეღარ შეძლებენ დეპოზიტარი ქვითრებიდან უცხოურ ვალუტაში დივიდენდების შეგროვებას,“ - წერს Bloomberg.
პუტინის ბრძანებით, უცხოურ ბირჟებზე რუსული დეპოზიტარებით ვაჭრობა რამდენიმე დღეში უნდა შეწყდეს, თუმცა ეს უფრო შებღალული პრესტიჟის დაცვის მცდელობაა, რადგან ნიუ-იორკის საფონდო ბირჟამ, Nasdaq-მა, ლონდონის საფონდო ბირჟამ და სხვა წამყვანმა საერთაშორისო ბირჟებმა რუსული აქციები ჯერ კიდევ მაშინ გაყინეს, როცა პუტინმა თებერვალში უკრაინასთან ომი დაიწყო.
ბრძანება, ასევე, ითვალისწინებს, რომ ანულირებული დეპოზიტარების უცხოელმა მფლობელებმა უნდა მიიღონ ჩვეულებრივი აქციები, რომლებიც რუსეთის არარეზიდენტ ანგარიშებზე არის განთავსებული.
Bloomberg-ის შეფასებით, უცხოური ლისტინგის აკრძალვა კიდევ ერთი დარტყმაა რუსი მილიარდერებისთვის, რომლებიც ისედაც დასავლეთის სანქციების სამიზნე არიან. მათზე დარტყმაა, ასევე, კრემლის მიერ კაპიტალის კონტროლი, რომელიც ფულის საზღვარგარეთ გატანის შესაძლებლობას ზღუდავს.
„ამით დაზარალდება იმ აქციონერების უფლებები, რომლებსაც სჯერათ რუსეთის, მრავალი წლის განმავლობაში ეწეოდნენ ინვესტიციებს რუსულ ბაზარზე და რუსული აქციების პირდაპირი ფლობა არ შეუძლიათ. მათ არაფერი აქვთ საერთო პოლიტიკასთან და არის რისკი, რომ საკუთრების უფლება უბრალოდ დაკარგონ,“ - განუცხადა ერთ-ერთმა რუსმა მაგნატმა გამოცემა „კომერსანტს.“
რუსულ კომპანიებს შორის, რომლებიც აქციებს საზღვარგარეთ ფლობენ, არის „სბერბანკი“, VTB, რომლის ლისტინგიც ლონდონში სანქციების შედეგად უკვე შეწყვეტილია, ასევე, „გაზპრომი,“ „აეროფლოტი,“ „ნოვატეკი,“ „ნორილსკ ნიკელი,“ „ლუკოილი,“ „სურგუტნეფტეგაზი“ და სხვები. ფასიანი ქაღალდების უმეტესი ნაწილით ვაჭრობა საზღვარგარეთ შეჩერებულია.
როგორც ცნობილია, გაერთიანებული სამეფოს საგადასახადო ორგანომ, HM Revenue and Customs-მა სამშაბათს განაცხადა, რომ მოსკოვის საფონდო ბირჟის აღიარებულ სტატუსს გააუქმებს, რაც ბრიტანეთის მთავრობის მიერ რუსეთისთვის დაწესებულ უპრეცედენტო სანქციებს კიდევ უფრო ამძიმებს.