უთანაბრო გარემო უცხოურ კომპანიებთან მიმართებით, ბუნდოვანი სანებართვო სისტემები, ამ და სხვა საკითხების საკანონმდებლო ინიციატივებით დარეგულირებისთვის სახმელეთო ტრანსპორტის ასოციაცია შეიქმნა.

ასოციაციის მიზნებსა და პრობლემებზე ,,ბიზნესპრესნიუსთან“ ასოციაციის დირექტორმა, დავით მესხიშვილმა ისაუბრა.

მისი თქმით, არსებული პრობლემების მოგვარებასთან ერთად, აუცილებელია, რომ საქართველოში ტრანსპორტისა და საგზაო უსაფრთხოების კუთხით ევროდირექტივები დაინერგოს.

„გადამზიდავი კომპანიების მიერ შეიქმნა სახმელეთო ტრანსპორტის ასოციაცია, რომელიც წევრობაზეა დაფუძნებული. გაერთიანების მიზანია საკანონმდებლო ინიციატივების წარდგენა, რომლებიც ამ ბიზნესს სწორ და თანაბარ გარემოში მოაქცევს. მეორე მიზანი, იმ საერთაშორისო რეგულაციების დაწევაა, რომლებთან მიმართებით საქართველოს მნიშვნელოვანი ჩამორჩენა აქვს, ანუ უნდა მოხდეს, ევროდირექტივების დანერგვა.

ასევე, ძალიან მნიშვნელოვანია, რომ უთანაბრო გარემო, რომელიც ამ ბიზნესშია, გამოსწორდეს. არიან უცხოური კომპანიები, რომლებიც თავის ქვეყანაში ვერ საქმიანობენ, იქ ვერ აკმაყოფილებენ პირობებს და შემოდიან საქართველოში. ადგილობრივ ბიზნესსა და მათ შორის, არ არის თანაბარი სასტარტო პირობები. ასოციაციის მიზეზიც და მიზანიც, ამ პრობლემების გამოსწორებაა.

დეტალებში რომ ჩავიდეთ, გადაზიდვები ხორციელდება მრავალჯერადი ნებართვებით, მათი რაოდენობა კი როგორც ჩანს, არ არის საკმარისი. გადამზიდველები ითხოვენ, რომ ჩვენმა სახელმწიფომ ქვეყნებთან აწარმოოს სწორი და დროული კომუნიკაცია, რადგან ნებართვები როცა იწურება, ტვირთის გადაზიდვა ვეღარ ხდება და ადგილობრივ კომპანიებს ანაცვლებენ სხვა ქვეყნიდან შემოსული კომპანიები და ჩვენი ბიზნეს კარგავს ადგილს. ბიზნესის ადგილს, რომელმაც ბიუჯეტში თანხა უნდა შეიტანოს, ანაცვლებენ კომპანიები, რომლებიც თავის ქვეყნაში არ ფლობენ ხშირად შესაბამის ნებართვებს. ეს სისტემა ბუნდოვანია. გამოდის ისე, რომ ადგილობრივმა კომპანიებმა უნდა დააკმაყოფილონ უამრავი რამ, რაც ხშირ შემთხვევაში არ მოეთხოვებათ უცხოურ კომპანიებს. ისინი შემოდიან საქართველოში და პრაქტიკულად გამოდის, რომ უპრობლემოდ იღებენ ერთჯერად და მრავალჯერად ნებართვებს. ჯანსაღ კონკურენციას კი არ უფრთხის ვინმე, სასტარტო პირობები უნდა იყოს საერთო. უცხოური კომპანიები არ უნდა აკეთებდნენ იმას ადვილად, რისთვისაც ადგილობრივ კომპანიებს მაღალი მოთხოვნები აქვთ წაყენებული.

ასევე, ადგილობრივ ბაზარზე პრობლემაა ე.წ დისპეჩერების საქმიანობა, რომლებიც არ საჭიროებენ არც მოთხოვნების დაკმაყოფილებას და არც ავტო სატრანსპორტო საშუალების ფლობას. უბრალოდ, აკავშირებენ დამკვეთს შემსრულებელთან და ეს ქმნის ცალკე პრობლემას.

შემდეგ კი, ხდება ისე, რომ ნებართვები, როცა საკმარისი აღარაა, ზედმეტობით აღებული ნებართვებით შავი ბაზრის პრინციპით მიდის ვაჭრობა.

ასე რომ, ძალიან სერიოზული პრობლემების წინაშე დგანან გადამზიდველები, ჩვენი მიზანი კი ხაზგასმით უნდა აღინიშნოს, არის უსამართლო და ბუნდოვანი ნებართვების სისტემის გამოსწორება. როცა ასოციაცია იქმნებოდა, ჩვენ ვიცოდით აბსოლუტურად ყველა კომპანიის აზრი, რომლებიც თვლიან, რომ უცხოურ გადამზიდავ კომპანიებთან მიმართებით ადგილობრივი ბიზნესი ცალსახად დაჩაგრულ მდგომარეობაშია. ეს ბიზნესი, აქამდე თუ ვითარდებოდა, დღეს შეიძლება ითქვას, რომ იმ დონის უკუსვლაა, შეიძლება ადგილობრივი კომპანიები გაკოტრდნენ.

ჩვენ მუდმივად გვესმის პოლიტიკაზე პასუხისმგებელი პირებისგან, რომ საქართველო უნდა იყოს სატრანსპორტო და ლოგისტიკური ჰაბი რეგიონისთვის, პრაქტიკული ნაბიჯები კი არ იდგმება, თუ მაგისტრალის მშენებლობას არ ჩავთვლით. ამ ნაწილში წინ რომ წავიდეთ, ევროდირექტივების დანერგვაა საჭირო, რაც სამწუხაროდ, შეჩერებულია და ჩვენი ერთ-ერთი მიზანი ესეცაა, რომ საქართველო როგორმე დაეწიოს საერთაშორისო რეგულაციებს, რომლის დანერგვის ვალდებულებაც გვაქვს აღებული“, - განაცხადა დავით მესხიშვილმა ,,ბიზნესპრესნიუსთან“.

მისივე თქმით, ასოციაციაში ამჟამად 20 კომპანიაა გაწევრიანებული, თუმცა წევრების ოდენობა მზარდია.

BPN.GE