რუსეთის სავაჭრო ცენტრებში საცალო ვაჭრობასთან დაკავშირებულმა, მინიმუმ, 100-მა კომპანიამ შეწყვიტა ან შეამცირა მუშაობა, რომლებსაც საკუთარი მაღაზიები და რესტორნები ჰქონდათ ან პროდუქტების მიწოდებას ეწეოდნენ, ხოლო დარჩენილი მოიჯარეები ფასდაკლებებს ითხოვენ. Forbes-ის მონაცემებით, მაღაზიების დახურვამ შესაძლოა, წლის ბოლომდე სავაჭრო ცენტრების გაქირავების შემოსავალი 30-50%-ით შეამციროს.
CBRE-ის ანალიტიკოსებმა დახურული მაღაზიების წილი ბრენდების მიხედვით 15%-ად, ფართობის მიხედვით კი 20%-ად შეაფასეს. მსგავს მონაცემებს აქვეყნებს BlackStone S.A. Ricci და Knight Frank-იც, რომლის მიხედვითაც, სავაჭრო ცენტრებს იჯარით აღებული ფართობი, დაახლოებით, 20-25%-ით შეუმცირდათ.
კვლევითი Cushman & Wakefield-ის მიხედვით, უმსხვილეს სავაჭრო ცენტრებში საცალო მოვაჭრეთა წილმა, რომლებმაც ვაჭრობა შეწყვიტეს, შესაძლოა, მთლიანი ფართობის 60%-ს მიაღწიოს. Crocus Group-ის პირველი ვიცე-პრეზიდენტის, ემინ აგალაროვის თქმით, სხვადასხვა სავაჭრო ცენტრებში დახურული მაღაზიების წილი შესაძლოა, იჯარით აღებული ფართობის 20%-დან 45%-მდე ვარირებდეს.
„ტრაფიკს პანდემიამდელი დონისთვის ისედაც არ მიუღწევია და 2021 წლის ანალოგიურ პერიოდს ოდნავ აღემატება, 2019 წელს კი 15-20%-ით ჩამორჩება,“ - აცხადებს CBRE-ის საცალო ვაჭრობის დეპარტამენტის ხელმძღვანელი, მარინა მალახათკო.
Becar Asset Management-ის ვიცე-პრეზიდენტ ოლგა შარიგინას გამოთვლით, მაღაზიებს, რომლებმაც მუშაობა შეწყვიტეს, სავაჭრო ცენტრის მთლიანი ტრაფიკის 50-60% -ზე მეტი მოჰქონდათ. მისი პროგნოზით, 2022 წლის ბოლოსთვის ტრაფიკი შესაძლოა, 15-20%-ით, ხოლო იჯარის შემოსავალი 20-30%-ით შემცირდეს.
IPG.Estate-ის მმართველი პარტნიორი, ივან პოჩინშჩიკოვი უახლოეს მომავალში ტრაფიკის 10-15%-ით კლებას მოელის, წლის ბოლომდე კი ეს მაჩვენებელი 25%-ით, ხოლო შემოსავალი 30-40%-ით შემცირდება.
Cushman & Wakefield-ის სავაჭრო უძრავი ქონების განყოფილების ხელმძღვანელი, ოლგა ანტონოვას პროგნოზით, „მეიჯარეების შემოსავალი, რაც მოიჯარეების რაოდენობაზე არის დამოკიდებული, 30-50%-ით ნამდვილად შემცირდება“.
„უცხოელების წასვილისთანავე, რუსულმა კომპანიებმა, როგორც ამბობენ, „შანსი გამოიყენეს“ და მეიჯარეებისგან შეღავათები მოითხოვეს,” - აცხადებს რუსეთის, ბელარუსისა და ყაზახეთის სავაჭრო ცენტრების კავშირის პრეზიდენტი, ბულატ შაკიროვი.
ის მაგალითად ასახელებს შემოქმედებითი საქონლის ჰიპერმარკეტების ქსელ „ლეონარდოს“, „დეტსკი მირსა“ და მაღაზიების ქსელ Familia-ს. მათი მთავარი მოთხოვნა იჯარის პირობების ბრუნვის პროცენტზე გადატანაა.
„ჩვენ ბრუნვის პროცენტული გადახდის აბსოლუტურად პატიოსან სისტემაზე გადასვლას ვთავაზობთ: რამდენსაც გავყიდით, იმდენს გადავიხდით,” - აცხადებს „ლეონარდოს“ დირექტორთა საბჭოს თავმჯდომარე, ბორის კაცი.
მისი თქმით, როცა შემოსავალი 20%-ით მცირდება, ქსელს გასანულებლად მიმდინარე ტარიფზე ორჯერ დაბალი ქირის გადასახადი სჭირდება.