2022 წელს საბანკო სექტორს საკმაოდ დადებითი ზრდის მოლოდინი აქვს. როგორც „თიბისი ბანკის“ გენერალურმა დირექტორმა ვახტანგ ბუცხრიკიძემ „ფორმულას“ ეთერში განაცხადა, ბოლო თვეების სტატისტიკით უცხოური ვალუტის დეპოზიტები მნიშვნელოვნად არის გაზრდილი.
„საბანკო სექტორი და ზოგადად ფინანსური სექტორი, არის შუამავალი, ანუ მნიშვნელოვანწილად დამოკიდებულია ეკონომიკაზე. გამომდინარე იქიდან, რომ ეკონომიკური ზრდა არის საკმაოდ მაღალი, შესაბამისად საბანკო სექტორის დამოკიდებულებიდან გამომდინარე წელს საკმაოდ ნორმალური ზრდა და მაჩვენებლებიც საკმაოდ კარგი იქნება, იმიტომ, რომ ყველა ინდუსტრია საკმაოდ დადებით მაჩვენებლებს იძლევა. რაც შეეხება მიგრანტების მონაცემებს ანგარიშების გახსნასთან დაკავშირებით, არის სებ-ის რეგულაციები და ემატებოდა ევროკავშირის, ამერიკული და ბრიტანული რეგულაციები, რაც არსებობს ყველა ამ წესების და მოთხოვნების დაკმაყოფილების შემდეგ მიმდინარეობდა ანგარიშების გახსნა. ჯამურად შეიძლება ითქვას, რომ საკმაოდ მნიშვნელოვნად ბოლო თვეების განმავლობაში უცხოური ვალუტის დეპოზიტები არის მნიშვნელოვნად გაზრდილი. რაც ირიბად რას ნიშნავს? რომ ამან უნდა გამოიწვიოს ის, რომ პოტენციურად სესხების გაზრდის მეტი საშუალება არსებობს“, - განმარტა ვახტანგ ბუცხრიკიძემ.
„თიბისი ბანკის“ გენერალური მენეჯერი ფიქრობს, რომ ამ ყველაფრის გათვალისწინებით, შეიძლება მოხდეს ის, რომ ნაწილი დეპოზიტების რომელიც დღეს უცხოურ ვალუტაშია, საპროცენტო განაკვეთების გამო, თანდათანობით მოხდეს მათი გადაცვლა ლარებში.
„ის რომ საკმაოდ დიდი სხვაობა არსებობს უცხოური ვალუტისა და ეროვნული ვალუტის დეპოზიტების საპროცენტო განაკვეთებს შორის კარგი ბერკეტი შეიძლება იყოს იმისთვის, რომ ნაწილობრივ, არა 100%-ით, მოხდეს ცვლილება სტრუქტურაში“, - ამბობს ვახტანგ ბუცხრიკიძე.