სამშენებლო ბიზნესის წარმომადგენლები უძრავი ქონების ბაზრის ტენდენციას დადებითად აფასებენ. მიუხედავად იმისა, რომ სექტორში განხორციელებული ინვესტიციების მოცულობა პრაქტიკულად 0-ის დონეზეა, შედარებით მცირე და საშუალო დონის პროექტები, რაც 2020 წელს უნდა განხორციელებულიყო, სრულად შესრულდა. ამის შესახებ ,,კომერსანტთან“ საქართველოს მენაშენეთა ასოციაციის ხელმძღვანელმა და კომპანია ,,არსის“ დამფუძნებელმა ირაკლი როსტომაშვილმა განაცხადა.
მისი ინფორმაციით, უძრავი ქონების ბაზარი ერთ-ერთი პირველია, სადაც პანდემიური პრობლემის გავლენა არ იგრძნობა და მდგომარეობა მეტნაკლებად მოგვარდა, თუმცა ინვესტიციები გამოწვევად რჩება.
,,ბოლო პერიოდში პანდემია ჩვენს სექტორში არ იგრძნობა, მობილობა აღდგენილია და რაიმე დამაბრკოლებელი რეგულაცია არ არის ქვეყანაში. ყველაზე მეტი პრობლემა არის ინვესტიციები, რომელიც პრაქტიკულად 0-ის დონეზეა. მიუხედავად ამისა, უძრავი ქონების ბაზარზე ზრდა ნამდვილად არის, 2020 წელს ვერ შევადარებთ, რადგან ეკონომიკა ჩაკეტილი იყო. 2019 წელთან შედარებით, ლოგიკურია, რომ მატება არის. 2021 წელს გაიყიდა ის ბინები, რომლის რეალიზაცია 2020 წელს იგეგმებოდა. უბრალოდ ელოდნენ კონკრეტულ დროს. ეს არ ნიშნავს, რომ მდგომარეობა გამოსწორდა, თუმცა უკეთესობა არის“, — განაცხადა ირაკლი როსტომაშვილმა ,,კომერსანტთან“.
მისი შეფასებით, უძრავი ქონების ბაზარზე განსაკუთრებით დადებითად იმოქმედა შეღავათებმა, რომელიც დეველოპერულ ბაზარს პანდემიურ პერიოდში დაუწესდა. თავის დროზე მთავრობის ამ ინიციატივამ სექტორში მაშველი რგოლის ფუნქცია შეასრულა.
,,შეღავათების გავლენა აშკარად პოზიტიურია. უძრავი ქონების ბაზარი და დეველოპმენტი ისეთი სეგმენტია, სადაც ნებისმიერი მხარდაჭერა კარგ უკუგებას იწვევს. 1 გაყიდული ბინა უამრავ ადამიანს ასაქმებს - ელექტრიკოსიდან, ტექსტილის და ტექნიკის მაღაზიების, ასევე ავეჯის ბიზნესის ჩათვლით. თუმცა პრობლემაა, რომ მსხვილი პროექტები არ განხორციელებულა, ამას უცხოური ინვესტიციების დეფიციტმა შეუშალა ხელი. პანდემიისას არც ერთი უცხოური ინვესტიცია არ განხორციელებულა უძრავი ქონების ბაზარზე“, - დასძენს ,,კომერსანტთან“ ირაკლი როსტომაშვილი.
საქართველოს სტატისტიკის ეროვნული სამსახურის მონაცემებით, 2021 წლის მესამე კვარტალში, წინა კვარტალთან შედარებით საცხოვრებელი უძრავი ქონების ფასების ინდექსი (RPPI) 2.5 პროცენტით შემცირდა, ხოლო ინდექსის წლიურმა ზრდამ 8.9 პროცენტი შეადგინა.
ამასთან, 2020 წლის საშუალოსთან შედარებით ინდექსი 6.2 პროცენტით არის გაზრდილი.
გარდა ამისა, ეკონომიკისა და მდგრადი განვითარების სამინისტროს სააგენტო „აწარმოე საქართველოში“ ცნობით, იპოთეკური სესხის სუბსიდირების პროგრამით 1-ლი სექტემბრიდან 16 დეკემბრამდე 965 იპოთეკური კრედიტი გაიცა.
დამტკიცებული სესხების ჯამური მოცულობა 107 010 382 ლარს შეადგენს.
მარი ჩიტაია
უძრავი ქონება
