„თიბისი კაპიტალის“ უძრავი ბაზრის მიმოხილვის მიხედვით, თბილისში, ოქტომბრის თვეში, უძრავი ქონების ფასი 28%-თაა გაზრდილი, ხოლო ქირის ფასი - 120%-ით. კვლევაში ნათქვამია, რომ უძრავ ქონებაზე მოთხოვნა მიგრანტების ზრდითა და ლარის კურსის არასტაბილურობითაა გამოწვეული.
ბიზნეს-კონსულტანტ ლევან კობერიძის აზრით, საქმე ე.წ „ირიბ ეფექტთან“ გვაქვს, როცა უძრავი ქონების ფასის ზრდა, მიგრანტების მიერ ბინის ქირავნობის მოთხოვნის ზრდითაა განპირობებული.
„აქ გვაქვს საქმე ე.წ „ირიბ ეფექტთან“, როცა ბინების ფასი მომატებულია შემდეგი ფაქტორით: საქართველოში ძალიან ბევრი მიგრანტის ჩამოსვლის გამო, სწრაფად მოიმატა გაქირავებაზე მოთხოვნამ. შესაბამისად, დაინახეს რა ეს ტენდენცია, ბევრმა ადამიანმა, რომელსაც გარკვეული კაპიტალი გააჩნდა ჩათვალა, რომ ბანკის საპროცენტო განაკვეთზე გაცილებით მეტი სარგებლის მიღება შეეძლო, თუკი ბინას იყიდდა და მერე გააქირავებდა. ამ ხალხმა დაიწყო უკვე აშენებული, განსაკუთრებით პატარა ფართის, ბინების ყიდვა, რომ სწრაფად გაერემონტებინათ, მერე გაექირავებინათ და მაღალი მოგება მიეღოთ. ეს დეველოპერებმაც დაინახეს და ახალაშენებულ ბინებზე გაზარდეს ფასები. სწორედ ამ „ირიბი ეფექტის“ გამო არის გაზრდილი ბინების ფასი,“ - აცხადებს ლევან კობერიძე „კომერსანტთან“ საუბრისას.
„თიბისი კაპიტალის“ კვლევაში ნათქვამია ისიც, რომ ბინების მყიდველებიდან დაახლოებით 5%-ია მიგრანტი, დანარჩენი ისევ საქართველოს მოქალაქეები არიან. ლევან კობერიძის თქმით, კვლევის სწორედ ეს ნაწილი ადასტურებს მისი მოსაზრების სიზუსტეს.
„ისევ საქართველოს მოქალაქეები ყიდულობენ უძრავ ქონებას. ცუდი ისაა, რომ მსგავსი ტენდენცია, გაზრდილი ფასების მიუხედავად, საქართველოს ეკონომიკას რეალურად არაფერს აძლევს იმის გარდა, რომ იმ კონკრეტულ ადამიანებს, ვისაც ეს ფული ჰქონდა, ბინა იყიდა და გააქირავა, შემოსავალი უჩნდებათ. ეს ეკონომიკაში მნიშვნელოვან და სასიკეთო ძვრებს არ ახდებს. უბრალოდ მივიღეთ ის, რომ ფასები გვაქვს ძალიან ძვირი. თუ ერთი წლის წინ ახალგაზრდა წყვილს, პირობითად, 50-60 000 დოლარად შეეძლო ბინის ყიდვა, ახლა 100-120 000 დაუჯდება“, - აცხადებს ლევან კობერიძე.