ბიტკოინის ღირებულება დღეს 29,731 დოლარამდე დაეცა, რაც 2021 წლის ივლისის შემდეგ ყველაზე დაბალი მაჩვენებელია. გასულ კვირას ის, თითქმის, 12%-ით გაუფასურდა, რაც იანვრის შემდეგ ყველაზე უარესი ყოველკვირეული ზარალია. მსოფლიოში სიდიდით მეორე კრიპტოვალუტა ეთერიუმი გუშინ 2,360 დოლარამდე დაეცა, რაც თებერვლის შემდეგ ყველაზე დაბალი მაჩვენებელია, ხოლო პატარა მონეტები, ანუ „ალტკოინები“ უფრო აგრესიულად გაიყიდა.
Reuters-ის ცნობით, კრიპტოვალუტის გაუფასურება ფედერალური სარეზერვო სისტემის (Fed) მიერ საპროცენტო განაკვეთის მატებას უკავშირდება. სააგენტო წერს, რომ „ბიტკოინს აქვს მწირი გამოცდილება საპროცენტო განაკვეთის მატებაზე, რაც საფრთხეს უქმნის ინვესტორებს, რომლებიც მისი დრამატული ვარდნისგან მოგების მიღებას ცდილობენ.“
Fed-მა გასულ კვირას განაკვეთი 0,5 საბაზისო პუნქტით გაზარდა, რაც ბოლო 22 წლის განმავლობაში ყველაზე დიდი ზრდაა. Fed-ის განცხადებით, მარტის მცირე ზრდის შემდეგ საპროცენტო განაკვეთი 0,75%-დან 1%-მდე დიაპაზონში გაიზარდა, ხოლო როცა აშშ-ში ინფლაცია 40 წლის მაქსიმუმს მიაღწევს, მოსალოდნელია შემდგომი ზრდაც. CME ჯგუფის FedWatch ინსტრუმენტის მიხედვით, კიდევ 0,5 საბაზისო პუნქტით შემდგომ ზრდას ივნისსა და ივლისში, ხოლო მეოთხე ჯერზე გაზრდას სექტემბერში მოელიან. Fed-ის ამ ახალი ტრაექტორიით, საპროცენტო განაკვეთები მომავალი წლის დასაწყისში, სავარაუდოდ, 3%-ს მიაღწევს. ამან კრიპტოვალუტისა და სხვა სარისკო, ანუ ტექნოლოგიური კომპანიების აქტივების დაცემა გამოიწვია.
„ეს არ არის პირველი შემთხვევა, როცა ჩვენ ამ დონეს მივაღწიეთ. ბიტკოინის რისკისა და მოგების თანაფარდობა მეტად კარგი იყო ბოლო ერთი წლის განმავლობაში, თუმცა ამჟამად განსხვავებულ მაკროეკონომიკურ ფონს ვხედავთ. შეშფოთება ამჯერად განსხვავებულია იმაზე, დავინახავთ თუ არა სუსტ განწყობას ტრადიციულ ფინანსურ ბაზრებზე, რაც, სავარაუდოდ, ინფლაციის პერსპექტივასა და მომდევნო რამდენიმე თვეში ან წელში განაკვეთების გაზრდის ალბათობას უკავშირდება,“ - აცხადებს სინგაპურში დაფუძნებული კრიპტოპლატფორმა Stack Funds-ის მთავარი საოპერაციო დირექტორი, მეტ დიბი.
„უფასო ფულის ეპოქა დასრულდა. ხდება ინვესტორების მადის დიდი კორექტირება. გაჩნდა კითხვა, განიხილავს თუ არა ხალხი კრიპტოვალუტას, როგორც დივერსიფიკაციის ინსტრუმენტს ცუდი ეკონომიკის პირობებში, თუ მისი ქონა მხოლოდ კარგ დროში ღირს," - აცხადებს ლოს ანჯელესის Bitcoin IRA-ს თანადამფუძნებელი და მთავარი საოპერაციო დირექტორი, კრის კლაინი.
Reuters-ის ცნობით, მხოლოდ კრიპტობაზრები კი არა, კაპიტალის ბაზრებიც დაეცა, რადგან ინვესტორები შიშობენ, რომ გლობალური ცენტრალური ბანკები მზად არიან, საჭიროების შემთხვევაში, ინფლაციის შეკავების მიზნით ეკონომიკა რეცესიაში შეიყვანონ.
გასულ კვირას Nasdaq-ისა და S&P 500-ის ინდექსი მეხუთე კვირა, ხოლო Dow Jones-ის ინდექსი მეექვსე კვირა ზედიზედ დაეცა. S&P 500-ისთვის ეს 2011 წლის შუა პერიოდის შემდეგ, Nasdaq-ისთვის კი 2012 წლის ბოლოდან ყველაზე გრძელი წაგების სერია იყო.
კრიპტოვალუტები
