საქართველოში უკრაინის ელჩის მოვალეობის დროებითი შემსრულებელი ანდრი კასიანოვი საქართველოს მადლობას უხდის იმ ჰუმანიტარული დახმარებისთვის, რომელიც მისი ქვეყნისთვის შეგროვდა. გარდა ამისა, მან საელჩოში გამართულ ბრიფინგზე მადლობა გადაუხადა იმ ადამიანებს, რომლებიც უკრაინისა და უკრაინელი ხალხის მხარდამჭერ აქციებს მართავენ საქართველოს სხვადასხვა ქალაქში.
"ჩვენ ვხედავთ, რომ ქართველი ხალხი თვალს ადევნებს მოვლენების განვითარებას უკრაინაში და მართავს მრავალრიცხოვან გამოსვლებს საქართველოს ქალაქებსა და დასახლებულ პუნქტებში, რითაც გამოხატავს სოლიდარობას უკრაინის და უკრაინელი ხალხის მიმართ.
უკრაინა და საქართველო მოძმე ერები არიან, რომლებმაც განიცადეს რუსეთის მხრიდან აგრესია - ეს უბედურება მათ აერთიანებთ. უკრაინას და საქართველოს მხოლოდ ერთად შეუძლიათ შექმნილი უსიამოვნებების გადალახვა. ამიტომ მოვუწოდებ ყველას, ყველა საფეხურზე მდგომს, ერთიანობისკენ და საერთო ქმედებისკენ რუსეთის ბარბაროსული აგრესიის შესაჩერებლად", - თქვა მან.
შეგახსენებთ, უკვე მეთვრამეტე დღეა, რუსეთი უკრაინის ტერიტორიაზე სრულმასშტაბიან საომარ მოქმედებებს ახორციელებს. რუსეთი უკრაინაში 24 თებერვალს, გამთენიისას შეიჭრა და მას შემდეგ განუწყვეტლივ ბომბავს, როგორც სამხედრო ობიექტებს, ისე მშვიდობიან მოსახლეობას. მოსკოვი საჯარო განცხადებებში უარყოფს სამოქალაქო ობიექტების მიზანში ამოღებას. გაეროს მონაცემებით, უკრაინა უკვე დატოვა 2.5 მილიონმა ადამიანმა.
უკრაინა რუსეთის ტერორისტ ქვეყნად გამოცხადებას ითხოვს და ჰააგის სასამართლოში ჩივის. სასამართლო პროცესი გასულ კვირას დაიწყო, თუმცა პროცესზე არ გამოცხადდა რუსეთის წარმომადგენელი იმ მიზეზით, რომ რუსული მხარის მტკიცებით, ჰააგის სასამართლოს ამ საკითხზე მსჯელობის ლეგიტიმაცია არ აქვს.
როგორც უკრაინის სახალხო დამცველი აცხადებს, სრული სიზუსტით გროვდება რუსეთის მიერ უკრაინაში ჩადენილი სამხედრო დანაშაულის ყველა ფაქტი და უკრაინა მას სამხედრო ტრიბუნალამდე მიიტანს.
რუსეთს უკრაინაში შეჭრის და იქ საომარი მოქმდებების გამო სანქციები დაუწესა ლამის მთელმა მსოფლიომ, უიშვიათესი გამონაკლისის გარდა.
უკრაინა-საქართველო
