2022 წლის ევროვიზიის გამარჯვებული გახდა უკრაინული ჯგუფი Kalush Orchestra სიმღერით Stefania.
40 ქვეყნის ეროვნული ჟიურის და მაყურებლების დაჯამებული ხმებით უკრაინამ 631 ქულა მიიღო, მეორე ადგილზე გასულმა დიდმა ბრიტანეთმა კი - 466 ქულა.
ევროვიზიის ფინალში სიმღერის შესრულების შემდეგ Kalush Orchestra-ს წევრებმა მსოფლიოს „აზოვსტალის“ დახმარება სთხოვეს:
„ყველას გთხოვთ, დაეხმარეთ უკრაინას, მარიუპოლს! დაეხმარეთ „აზოვსტალს“, ახლავე!“.
საქართველოს ხალხმა (მაყურებელმა) უკრაინას მაქსიმალური 12 ქულა მიანიჭა. საქართველოს ეროვნულმა ჟიურიმ კი - 6.
საქართველოს 2022 წლის ევროვიზიაზე მუსიკალური ჯგუფი Circus Mircus წარმოადგენდა, რომელიც ფინალში ვერ გადავიდა.
2022 წლის ევროვიზიის კონკურსი ტურინში გაიმართა და მასში 40-მა ქვეყანამ მიიღო მონაწილეობა.
საქართველოს საზოგადოებრივმა მაუწყებელმა ევროვიზიის სიმღერის კონკურსზე ეროვნული ჟიურის ქულებთან დაკავშირებით განცხადება გაავრცელა
„ევროვიზიის სიმღერის კონკურსზე საქართველოდან ეროვნულმა ჟიურიმ ყველაზე მაღალი შეფასება – პირველი ადგილი უკრაინას მისცა, რაც 12 ქულას ნიშნავს. ამას მოწმობს ნოტარიულად დამოწმებული დოკუმენტი, რომელიც გადაეგზავნა ევროვიზიის სიმღერის კონკურსის ორგანიზატორებს. საზოგადოებრივი მაუწყებელი ამ საკითხთან დაკავშირებით ევროვიზიის კონკურსის ორგანიზატორებთან დეტალებს არკვევს“, - ნათქვამია საზოგადოებრივი მაუწყებლის საიტზე გამოქვეყნებულ განცხადებაში.
"ჩვენი სიმამაცე მსოფლიოზე შთაბეჭდილებას ახდენს. ჩვენი მუსიკა იპყრობს ევროპას. მომავალ წელს, მესამედ თავის ისტორიაში, ევროვიზიას უკრაინა უმასპინძლებს. მჯერა, რომ ეს ბოლო არ იქნება. ყველაფერს გავაკეთებთ, რომ ერთ დღესაც, ევროვიზიის მონაწილეებსა და სტუმრებს მარიუპოლში ვუმასპინძლოთ. თავისუფალ, მშვიდობიან და აღდგენილ მარიუპოლში.
დიდი მადლობა კალუშ ორკესტრს გამარჯვებისთვის და ყველას, ვინც ხმა მოგვცა. დარწმუნებული ვარ, მტერთან ბრძოლაშიც ჩვენი გამარჯვების აკორდი შორს არაა. დიდება უკრაინას," - ასე ეხმაურება პრეზიდენტი ზელენსკი უკრაინის ევროვიზიაზე გამარჯვებას.
წყარო: რადიო თავისუფლება