უკრაინა საერთაშორისო თანამეგობრობას მიმართავს, მხარი დაუჭიროს სპეციალური ტრიბუნალის შექმნას უკრაინის წინააღმდეგ რუსეთის აგრესიის გამოსაძიებლად.

უკრაინის საგარეო საქმეთა მინისტრმა, დმიტრო კულებამ პრეზიდენტ პუტინის საჯარო აღიარებად შეაფასა მისი დღევანდელი განცხადება, რომ უკრაინაში „სპეციალური სამხედრო ოპერაციის“ დაწყება შეგნებული ქმედება იყო. კულება ტვიტერის ოფიციალურ გვერდზე წერს, რომ დანაშაული სახეზეა.

უკრაინის საგარეო საქმეთა მინისტრი კიდევ ერთხელ მოუწოდებს ყველა სახელმწიფოს, მხარი დაუჭირონ სპეცტრიბუნალის შექმნას.

დღეს, 7 სექტემბერს, ვლადივოსტოკში, "აღმოსავლეთის ეკონომიკურ ფორუმზე“ გამოსვლისას რუსეთის პრეზიდენტმა პუტინმა განაცხადა, რომ უკრაინამ სამხედრო მოქმედებები ჯერ კიდევ 2014 წელს დაიწყო „სახელმწიფო გადატრიალების“ შემდეგ და 8 წლის განმავლობაში დონბასში „გენოციდი“ მიმდინარეობდა, რუსეთმა კი, „მშვიდობიანი გზებით მოგვარების მრავალი მცდელობის შემდეგ გადაწყვიტა სარკისებურად ეპასუხა“. პუტინის თქმით, რუსეთმა ეს „შეგნებულად გააკეთა“ და მისი ყველა ქმედება მიმართულია „დონბასში მცხოვრები ადამიანების დახმარებისკენ“.

პუტინმა უკრაინაში შეჭრას უწოდა „ბოლომდე შესასრულებელი ვალი“ და განაცხადა, რომ საბოლოო ჯამში, ეს რუსეთის სუვერენიტეტს განამტკიცებს.

რუსეთმა, პრეზიდენტ პუტინის განკარგულებით, უკრაინის წინააღმდეგ 24 თებერვალს დაიწყო „სპეციალური სამხედრო ოპერაცია“, რომლის მიზნად გამოცხადდა უკრაინის „დემილიტარიზაცია და დენაციფიკაცია“. უკრაინის ტერიტორიაზე რუსული არმიის შეჭრას წინ უძღოდა პუტინის მიერ უკრაინის ორი სეპარატისტული რეგიონის, დონეცკის და ლუგანსკის ე.წ. სახალხო რესპუბლიკების „დამოუკიდებლობის“ აღიარება. მანამდე, რუსეთმა მოითხოვა, რომ უკრაინა არ გახდეს NATO-ს წევრი.

წყარო: radiotavisupleba