უკრაინის თავდაცვის მინისტრმა ოლექსი რეზნიკოვმა BBC-სთან ინტერვიუში განაცხადა, რომ უკრაინა ფაქტობრივად უკვე მიუერთდა ნატოს მიუხედავად იმისა, რომ ფორმალურად ჯერ ის ალიანსის წევრი არაა.
უკრაინა, როგორც ქვეყანა და უკრაინის შეიარაღებული ძალები ნატოს წევრები გახდნენ. დე ფაქტო, მაგრამ არა დე იურე. იმიტომ, რომ ჩვენ გვაქვს იარაღი და გვესმის, როგორ გამოვიყენოთ ისინი. დარწმუნებული ვარ, უახლოეს მომავალში ჩვენ გავხდებით ნატოს წევრები დე იურეც, - განაცხადა რეზნიკოვმა.
უკრაინის თავდაცვის მინისტრი არ ეთანხმება მოსაზრებას, რომ მისი ასეთი განცხადება შესაძლოა არაერთგვაროვნად იყოს მიღებული არა მარტო რუსეთში, არამედ თავად ნატოშიც - რადგან ჩრდილოატლანტიკურ ალიანსს არ სურს, რომ მას ომის მონაწილე მხარედ თვლიდნენ.
რეზნიკოვმა ასევე გამოთქვა რწმენა, რომ უკრაინა დასავლეთისგან ტანკებს, მოიერიშე თვითმფრინავებს და შორ მანძილზე მოქმედ რაკეტებს მიიღებს. მან ხაზგასმით აღნიშნა, რომ ზოგიერთმა დასავლურმა ქვეყანამ უკვე შეცვალა თავისი დამოკიდებულება უკრაინისთვის იარაღის მიწოდების საკითხში.