უკრაინისა და პოლონეთის საზღვარზე კრაკოვეც-კორჩევას განახლებული საკონტროლო-გამშვები პუნქტი სრულფასოვანად ამუშავდა. ამის შესახებ ინფორმაციას უკრაინის ინფრასტრუქტურის სამინისტრო Facebook-ზე ავრცელებს.

უწყების ცნობით, გამშვები პუნქტის მოდერნიზაციის ფარგლებში განახლდა სატრანსპორტო საშუალებებისა და სატვირთო მანქანების ზოლები, საბაჟო და საპასპორტო კონტროლის პავილიონები, გაფართოვდა პუნქტამდე მისასვლელი გზა (A-4) და აშენდა ავტობუსების ახალი ტერმინალი, რომელსაც გამტარიანობის რესურსი 30 ავტობუსიდან აქვს.

ახალი ტერმინალის გავლით ავტობუსების მიმოსვლა 16-დან 17 აგვისტოს შუაღამისას დაიწყო.

ინფრასტრუქტურის მინისტრის მოადგილე, მუსტაფა ნაიე Facebook-ზე წერს, რომ „სამუშაოებს ექვს თვეზე ოდნავ მეტი პერიოდი დასჭირდა, თუმცა ომისა და რესურსების სიმცირის მიუხედავად, პროექტი მაინც დასრულდა, რომელსაც ადრე, უკრაინული მხარის გარდა, ყველა უსარგებლოდ მიიჩნევდა.“

ყველა სამგზავრო ტრანსპორტი ცალკე ზოლში იმოძრავებს, რაც, მუსტაფა ნაიეს შეფასებით, „საზღვართან 10-20-კილომეტრიანი რიგის შემცირების ერთ-ერთი საშუალებაა.“

კრაკოვეც-კორჩევას გამშვები პუნქტის განახლების სამუშაოები სახელმწიფოთაშორისი პროექტის, „ღია საზღვრის“ ფარგლებში ჩატარდა. პროექტი, „ღია საზღვარი“ დასავლეთ საზღვარზე არსებული შეფერხებების აღმოფხვრასა და უკრაინა-ევროკავშირის მიმართულებით ლოგისტიკის გაუმჯობესებას ითვალისწინებს. ამ პროექტის ფარგლებში, 20 ივნისს კრაკოვეც-კორჩევას საგუშაგოზე მოდერნიზაციის პირველ ეტაპზე სატვირთო მანქანების ზოლების რაოდენობა 4-დან 10-მდე გაიზარდა, ასევე, საბაჟო და საპასპორტო კონტროლისთვის დამატებითი პავილიონები შეიქმნა.

ბიზნესპრესნიუსი