უმაღლესი რადა ამზადებს კანონპროექტს, რომელიც დამატებით გადასახადს დააწესებს იმ კომპანიებზე, რომლებიც რუსეთთან მუშაობას აგრძელებენ. ამის შესახებ დეპუტატმა იაროსლავ ჟელეზნიაკმა განაცხადა.
„ვმუშაობთ კანონზე, რომლის მიხედვითაც უკრაინაში დამატებითი გადასახადი დაეკისრებათ კომპანიებს, რომლებიც რუსეთთან მუშაობას განაგრძობენ. „ბიზნესის რეპარაციების შესახებ“ პოლონური იდეა ჩვენთანაც უნდა მუშაობდეს.
თუ აგრესორის სამხედრო სფეროს სპონსორობის ფული და სურვილი აქვთ, მაშინ თანხა უნდა მოიძებნოს იმისათვის, რომ აღდგეს ყველაფერი, რაც მან სხვა ქვეყანაში გაანადგურა“,- წერს დეპუტატი.
აღსანიშნავია, რომ მსგავსი იდეა უფრო ადრე პოლონეთში გაჩნდა. პოლონეთის მთავრობის წარმომადგენლის პიოტრ მიულერის განცხადებით, განიხილება გადასახადების გაზრდა იმ კომპანიებისთვის, რომლებიც უკრაინაში შეჭრის მიუხედავად, რუსულ ბაზარზე მუშაობას განაგრძობენ.
„პრემიერ-მინისტრმა მატეუშ მორავიეცკიმ წარმოადგინა რამდენიმე პუნქტი იმ საკითხებზე, რომლებიც საჭიროებენ კონსტიტუციის ცვლილებას“,- განაცხადა მიულერმა.
დღეს უკრაინის საგარეო საქმეთა სამინისტრომ გამოაქვეყნა იმ კომპანიების სიას, რომლებიც სრულად ან ნაწილობრივ აგრძელებენ ოპერირებას რუსეთის ტერიტორიაზე.
„კიდევ ერთხელ მოვუწოდებთ ამ კომპანიებს შეწყვიტონ საქმიანობა რუსეთში. ყოველ პროდუქტს, რომელსაც კომპანია აწვდის, აწარმოებს ან ყიდის რუსულ ბაზარზე, წვლილი შეაქვს სამხედრო ბიუჯეტში“,- წერს უწყება.