უკრაინამ განაცხადა, რომ რუსეთის ჰაკერები გასულ კვირაში მეორედ შეეცადნენ, მწყობრიდან გამოეყვანათ უკრაინის ელექტრომომარაგება, მაგრამ წარმატებას ვერ მიაღწიეს.

უკრაინის მთავრობის ოფიციალურმა წარმომადგენელმა, ვიქტორ ჟორამ, 12 აპრილს განაცხადა, რომ „სამხედრო ჰაკერულმა ჯგუფმა“ განახორციელა თავდასხმა, რათა „მწყობრიდან გამოეყვანათ ზოგიერთი ობიექტი, მათ შორის ელექტროქვესადგურები“.

თავდასხმა წარუმატებელი აღმოჩნდა და უკრაინის ხელისუფლების წარმომადგენლები გამოძიებას ატარებენ, დასძინა ჟორამ. მისი თქმით, სავარაუდოდ, თავდასხმა ამჟამად რუსეთის მიერ უკრაინის აღმოსავლეთში წარმოებული იერიშის მხარდაჭერისთვის განხორციელდა. უკრაინის კომპიუტერულ საგანგებო მდგომარეობებზე რეაგირების ჯგუფმა 12 აპრილს გამოქვეყნებულ განცხადებაში აღნიშნა, რომ ჰაკერულმა ჯგუფმა, რომელიც ადრე Sandworm-ის სახელით იყო ცნობილი, მავნე ჰაკერული პროგრამა განათავსა კომპიუტერებზე, რომლებიც უკრაინის მაღალი ვოლტაჟის ქვესადგურებს აკონტროლებს. ორგანიზაციამ განაცხადა, რომ ჰაკერებმა სისტემაში პირველად შეღწევა შეძლეს თებერვალში. მისი თქმით, „ელექტროქვესადგურების გათიშვა და კომპანიის ინფრასტრუქტურის მწყობრიდან გამოყვანა“ 8 აპრილისთვის იყო დაგეგმილი.

რუსეთი მტკიცედ უარყოფს უკრაინაზე კიბერთავდასხმაში ბრალდებებს.

კიბერუსაფრთხოების სლოვაკურმა კომპანია ESET-მა, რომელიც მონაწილეობდა გამოძიებაში, განაცხადა, რომ გამოყენებული მავნე პროგრამა არის განახლებული ვერსია იმ პროგრამისა, რომელმაც კიევში ელექტროენერგიის გათიშვა გამოიწვია 2016 წელს.

Radiotavisupleba.ge