უკრაინამ წითელი ჯვრის საერთაშორისო კომიტეტს (ICRC) სთხოვა, არ გახსნას პუნქტი დონის როსტოვში, რადგან, უკრაინული მხარის მტკიცებით, ეს ლეგიტიმურს გახდის მოსკოვის "ჰუმანიტარულ დერეფნებს" და უკრაინელთა გატაცებას.
რუსული მედია იტყობინება, რომ ICRC-ის ხელმძღვანელმა, პიტერ მაურერმა, რუსეთს დონის როსტოვში წითელი ჯვრის პუნქტის გახსნაში დახმარება სთხოვა.
უკრაინის პარლამენტის საზოგადოებრივი ჯანდაცვის კომიტეტის თავჯდომარე, მიხაილო რადუცკი, წითელ ჯვარს გეგმების შეცვლას სთხოვს.
"წითელი ჯვრის საერთაშორისო კომიტეტს მოგიწოდებთ, არ მისცეთ რუსულ ჰუმანიტარულ კვაზიდერეფნებს ლეგიტიმაცია და არ შეუწყოთ ხელი უკრაინელი ხალხის გატაცებასა და მათ იძულებით დეპორტაციას," - აცხადებს რადუცკი.
შეგახსენებთ, დონის როსტოვი რუსეთის უდიდესი ქალაქია, რომელიც უკრაინის აღმოსავლეთ საზღვარზე მდებარეობს.ამ ქალაქს რუსეთი ომის ზონიდან გადაყვანილი მოსახლეობის დროებითი განთავსების ბანაკებად იყენებს.
რუსული მხარე აცხადებს, რომ "სპეციალური სამხედრო ოპერაციის" ფარგლებში რამდენიმე ასეული ათასი გამოიყვანეს უკრაინიდან, რითაც მოსახლეობის დენაციფიკაციას უწყობენ ხელს, ხოლო უკრაინული მხარე ტრეფიკინგზე და მოსახლეობის ძალით ევაკუაციზე საუბრობს და ამტკიცებს, რომ ომის დაწყებიდან დღემდე რუსეთმა უკანონოდ გადაასახლა ათასობით ადამიანი, მათ შორის, დაახლოებით 15 000 მარიუპოლელი.
როგორც უკრაინის ვიცე-პრემიერი, ირინა ვერეშჩიუკი ამბობს, რუსეთმა ძალდატანებით გაიყვანა 40 ათასი ადამიანი უკრაინიდან. მისი განმარტებით, რუსეთს კვაზიდერეფნებით უკრაინელები გაურკვეველი მიმართულებით გაჰყავს. მისი თქმით, ეს მარშრუტი უკრაინულ მხარესთან არაა შეთანხმებული. ვერეშჩიუკის ვარაუდით, მოქალაქეები კიევის ოლქიდან ბელარუსში გადაჰყავთ.