უკრაინის ეკონომიკური უსაფრთხოების ბიუროს თანამშრომლებმა რუსი ოლიგარქის კუთვნილი მინერალური წყლის წარმოებისა და რეალიზაციის კომპანიის კორპორატიული უფლებები დააკავეს.

ბიურო ოლიგარქის ვინაობასა და კომპანიის სახელს არ ამხელს, თუმცა უკრაინული „ნოვოე ვრემია“ წერს, რომ საუბარია კომპანია IDS Group-ზე, რომელსაც უკრაინაში საერთაშორისო კომპანია, IDS Borjomi International ფლობს, ხოლო IDS Borjomi-ის მაჟორიტარი მფლობელი „ალფა ჯგუფის“ რუსული სტრუქტურაა, რომლის მთავარი ფიგურა და თანამფლობელი რუსი მილიარდერი, მიხაილ ფრიდმანია.

IDS Group უკრაინის მინერალური წყლის ბაზარზე ერთ-ერთი ლიდერი კომპანიაა. ეკონომიკური უსაფრთხოების ბიუროს ცნობით, „გამოძიებამ დაადგინა, რომ რუსი ოლიგარქი კომპანიას კვიპროსული კომპანიების მეშვეობით ფლობს.

ბიუროს განცხადებაში წერია, რომ „რუსი ბიზნესმენები ცდილობდნენ, შესაძლო სანქციები და უკრაინის კანონმდებლობით გათვალისწინებული საკუთრების უფლების ჩამორთმევა თავიდან აეცილებინათ. კერძოდ, ფიქტიური შეთანხმებებით, ისინი უკრაინის ტერიტორიაზე მდებარე აქტივების საკუთრებიდან გატანას გეგმავდნენ.“

გამომძიებელმა მოსამართლემ ყადაღა დაადო კომპანიის კორპორატიულ უფლებებს, რომლებიც ფასიანი ქაღალდებისა და ფულადი სახსრების სახით ჯამში 53,4 მლნ გრივნის (1 807 130 დოლარის) ოდენობის საწესდებო კაპიტალის წილებს შეადგენს.

ბიუროს ერთ-ერთი საკონსულტაციო სააგენტოს ღია მონაცემები მოჰყავს, რომლის მიხედვითაც, 2021 წელს ბრენდის სავარაუდო საბაზრო ღირებულებამ 10 მლრდ გრივნაზე (338 059 274 დოლარზე) მეტი შეადგინა.

რუსი ოლიგარქისა და ბიზნესმენების მიერ დანაშაულებრივი გზით მოპოვებული ქონების ლეგალიზაციის ფაქტზე სისხლის სამართლის საქმის წინასასამართლო გამოძიებას, გენერალური პროკურატურის პროკურორების საპროცესო ხელმძღვანელობით, ბიუროს დეტექტივები აწარმოებენ. ოპერატიულ მხარდაჭერას ეროვნული პოლიციის სტრატეგიული გამოძიების დეპარტამენტი ახორციელებს. ყოვლისმომცველი გამოძიების მიზნით, ეკონომიკური უსაფრთხოების ბიურო ფინანსური მონიტორინგის სახელმწიფო სამსახურთან, ფასიანი ქაღალდებისა და საფონდო ბაზრის ეროვნულ კომისიასთან, ასევე, სახელმწიფო საგადასახადო სამსახურთან თანამშრომლობს.

IDS Group-ის პორტფოლიო „მორშინსკის,“ „მირგოროდსკის,“ „ბორჯომის,“ Aqua Life-ისა და Hemp Water-ის სავაჭრო ნიშნებით მინერალური ბუნებრივი და სასმელი წყლის მოპოვება-გაყიდვის ბიზნესს მოიცავს.

2021 წლის სექტემბერში Dragon Capital-ის კომპანიების ჯგუფმა, რომელიც ჟურნალ „НВ“-ს („ნოვოე ვრემიას“), ვებგვერდ NV-სა და რადიო NV-ს ფლობს, IDS Borjomi International-ისგან Aqua-Eco-ს ჯგუფი შეიძინა. Aqua-Eco მინერალური წყალ „ტრუსკავეცკაიას“ მწარმოებელია.

მაისში უკრაინის სასამართლომ ოლიგარქ მიხაილ ფრიდმანის ოფშორული აქტივები დააყადაღა. დააკავეს იმ ჰოლდინგური კომპანიის ანგარიშები, რომელიც „ალფა-ბანკის“ 40%-ზე მეტს ფლობს.

Bpn.ge