საქართველოში მოქმედ კომერციულ ბანკებში რუსეთის ფედერაციის მოქალაქეების ანგარიშებზე 2022 წლის 31 ოქტომბრის მდგომარეობით განთავსებული თანხის ჯამური მოცულობა შეადგენს 2.4 მილიარდ ლარს - ინფორმაცია რადიო თავისუფლებამ ეროვნული ბანკიდან გამოითხოვა. საქართველოს ბანკებში რუსეთის მოქალაქეების მიერ განთავსებული თანხის მოცულობა უფრო მეტია, ვიდრე მაგალითად თბილისის ბიუჯეტი 2023 წელს.
საქართველოში მოქმედ კომერციულ ბანკებში რუსეთის ფედერაციის მოქალაქეების იმ ანგარიშების ჯამური რაოდენობა, რომლებზეც 2022 წლის 31 ოქტომბრისათვის დაფიქსირდა დადებითი ნაშთი, 147 412-ია. ამ ანგარიშების ნახევარზე მეტი, 87 589, უკრაინაში ომის დაწყების შემდეგ, 2022 წლის მარტიდან 1 ნოემბრამდე დროის პერიოდშია გახსნილი.
ეროვნული ბანკი განმარტავს, რომ შესაძლოა ანგარიშების რაოდენობა ზუსტად არ ასახავდეს რუსეთის იმ მოქალაქეების რაოდენობას, ვინც საქართველოს ბანკებში ანგარიში გახსნა, იმ გარემოების გათვალისწინებით, რომ "კონკრეტულ მოქალაქეს/იურიდიულ პირს შესაძლოა გახსნილი ჰქონდეს ერთზე მეტი ანგარიში სხვადასხვა ბანკში, რომელთა ჯამური რაოდენობა ასახულია საერთო რაოდენობაში."
მონაცემები აჩვენებს, რომ რუსეთის მოქალაქეების ფინანსური აქტივობები განსაკუთრებით გაიზარდა მიგრაციის ე.წ. მეორე ტალღის შემდეგ, რაც რუსეთში ნაწილობრივი მობილიზაციის გამოცხადებას მოჰყვა. სექტემბერსა და ოქტომბერში საქართველოს ბანკებს რუსი ეროვნების უფრო მეტი ახალი კლიენტი ჰყავდათ, ვიდრე მარტსა და აპრილში, როცა უკრაინაში ომი ახალი დაწყებული იყო.