უკრაინაში რუსული ინტერვენცია გრძელდება. კიევში ადამიანურ მსხვერპლთან ერთად ზარალსაც ითვლიან, რომელიც ყოველდღიურად იზრდება. უკვე განადგურებული ინფრასტრუქტურისა და შეჩერებული პროექტებით გამოწვეული დანაკარგის აღდგენას წინასწარ მონაცემებით $560 მლრდ-ზე მეტი დასჭირდება, რომელიც ნაწილობრივ შეიძლება რუსეთის გაყინული რეზერვებიდან დაიფაროს. სავალუტო ფონდის პროგნოზით წელს უკრაინის ეკონომიკა მინიმუმ 10%-ით შემცირდება.

მიიღე ინფორმაცია უფრო სწრაფად „კომერსანტის“  Telegram-ზე.

დათვლილი ზარალი - $565 მლრდ, მხოლოდ შენობების ნგრევის საფასური არ არის, მასში შედის, პირდაპირი საბიუჯეტო დანაკარგი, შეჩერებული ინვესტიციები, შეჩერებული სასოფლო-სამეურნეო სამუშაოები.

სავალუტო ფონდის პროგნოზი, არსებული ნგრევის ფონზე, ზედმეტად ოპტიმისტურად გამოიყურება. უკრაინის ეკონომიკა 2014 წელს 10.%-ით, ხოლო 2015 წელს 9.8%-ით შემცირდა. მაშინ უკრაინამ ყირიმის ნახევარკუნძული თავისი პორტებით და ნახშირით მდიდარი დონეცკის ოლქი დაკარგა. დღეს ქალაქების განადგურების მასშტაბი აბსოლუტურად სხვა არის. ყოველი მეოთხე უკვე საკუთარ სამშობლოში იძულებით გადაადგილებულად იქცა, ყოველი მე-12 უცხო ქვეყანაში ლტოლვილად, რაც თავის მხრივ საქართველოს მოსახლეობას უთანაბრდება. ქალაქების განადგურების მასშტაბიც 8 წლის წინანდლისგან შედარებით აბსოლუტურად სხვა არის. 2014-ისგან განსხვავებით წელს საერთაშორისო დახმარებაც ბევრად მეტი იქნება, მაგრამ ჯერ ომი გრძელდება, რასაც ჯერ დასრულების პირი არ უჩანს. არავინ აღადგენს კორპუსს, თუ ეცოდინება, რომ მეორე დღეს სარაკეტო იერიშით შესაძლოა ისევ დაინგრეს.

2014 წლამდე უკრაინაში შემოსავალი ერთ სულ მოსახლეზე საქართველოს მაჩვენებელს მცირედით აჭარბებდა, ჯამურად 19%-იანი ვარდნის შემდეგ კი მასაც ჩამორჩა. მაშინ საქართველოს ეკონომიკური ზრდის ტემპიც შემცირდა, რაც ნაწილობრივ უკრაინაში გამოუცხადებელ ომთან იყო დაკავშირებული. წელს ნეგატიური გავლენა გაცილებით დიდი იქნება, ფინანსთა მინისტრის მოადგილის გიორგი კაკაურიძის შეფასებით რუსეთ-უკრაინის ომი საქართველოს ეკონომიკას დაახლოებით $1 მლრდ-ით აზარალებს.

ომი გრძელდება. უკრაინაში პარტიზანული მოძრაობის გასაძლიერებლად ტყეების შეფოთვლას ელოდებიან. რუსული საოკუპაციო არმიის თითოეული დღე უკრაინისთვის ასობით დაღუპულისა და ათობით მლრდ-ის დანაკარგს ნიშნავს.