შეერთებული შტატების 45-ე პრეზიდენტმა დონალდ ტრამპმა განაცხადა, რომ რუსეთის ფედერაციის სრულმასშტაბიანი ომი უკრაინის წინააღმდეგ ერთ დღეში შეიძლება დასრულდეს. ამისთვის მას, სავარაუდოდ, მხოლოდ ორი სატელეფონო ზარი დასჭირდება.

პოლიტიკოსის თქმით, თუ მას კვლავ აირჩევენ შეერთებული შტატების პრეზიდენტად, მაშინვე დაურეკავს რუსეთის პრეზიდენტს ვლადიმერ პუტინს და უკრაინის პრეზიდენტ ვლადიმერ ზელენსკის. ის დარწმუნებულია, რომ მათი შეხვედრის ორგანიზებას შეძლებს.

„იმავე ღამეს, როცა ჩემი გამარჯვება გახდება ცნობილი, მე დავურეკავ პუტინს და ზელენსკის. ვეტყვი, რომ ისინი უნდა შეხვდნენ და გარანტიას ვაძლევ, რომ მოვაგვარებ ამ საკითხს, - თქვა ტრამპმა ფლორიდაში მხარდამჭერებთან გამოსვლისას.

ამასთან, მან დაარწმუნა, რომ სამშვიდობო ხელშეკრულების გაფორმება 24 საათში იქნება შესაძლებელი.

აღსანიშნავია, რომ საპრეზიდენტო არჩევნები შეერთებულ შტატებში 2024 წლის ნოემბერში უნდა ჩატარდეს. ტრამპი საპრეზიდენტო არჩევნებში მონაწილეობას გეგმავს.

დონალდ ტრამპი არასოდეს მალავდა თავის სიმპათიას რუსეთის პრეზიდენტის ვლადიმერ პუტინის მიმართ. მან საჯაროდ შეაქო პუტინი, როდესაც კრემლმა დონეცკის სახალხო რესპუბლიკის აღიარება გადაწყვიტა.

ამავდროულად, 2022 წლის აგვისტოში ტრამპმა განაცხადა, რომ რუსეთი უკრაინას თავს არ დაესხმებოდა, თუ უკრაინა ყირიმზე და NATO-ს წევრობაზე უარს იტყოდა.

გარდა ამისა, მან გააკრიტიკა უკრაინის დასავლური ტანკებით დახმარება. მისი თქმით, ამან შეიძლება კიევისთვის ბირთვული იარაღის მიწოდებაც გამოიწვიოს.