სრულმასშტაბიანი ომის დაწყების შემდეგ უკრაინელი ბიზნესმენისა და მილიარდერის, ვიქტორ პინჩუკის კომპანია Interpipe-მა პირველად ევროკავშირის ბაზრისთვის ახალი ტიპის სარკინიგზო ბორბლების გამოშვება დაიწყო. ამის შესახებ კომპანიის განცხადებაში არის ნათქვამი, რასაც „ნოვოე ვრემია“ ავრცელებს.
პირველი ექსპერიმენტული პარტია მომხმარებელს უკვე გაეგზავნა. Interpipe-მა ახალი ტიპის ბორბლის შემუშავება ჯერ კიდევ ომამდე დაიწყო. კლიენტის მთავარი მოთხოვნა დისკის სპეციალური ფორმის შექმნა იყო, რომლის დიამეტრიც 840 მმ იქნებოდა.
კომპანიის ცნობით, „ეს არის მე-2 კატეგორიის ბორბალი, რომელიც ევროპული სტანდარტის მიხედვით ER7 მარკის ფოლადისგან არის დამზადებული. ასეთი პროდუქტი 1435- მილიმეტრიან სარკინიგზო ხაზზე მოძრავი ელექტროშემადგენლობის ვაგონებისთვის არის განკუთვნილი, ანუ მისი დამონტაჟება ჩვეულებრივ საქალაქთაშორისო ელექტრომატარებლებზე არის შესაძლებელი.
Interpipe-ში აცხადებენ, რომ მალე უკრაინული ბორბლები ევროკავშირის ერთ-ერთი უდიდესი ქვეყნის ეროვნული სარკინიგზო ქსელის ვაგონებზე გამოჩნდება.
Interpipe მილებისა და სარკინიგზო პროდუქტების სამრეწველო კომპანიაა. მისი პროდუქცია მსოფლიოს 80-ზე მეტ ქვეყანას მიეწოდება. 2021 წელს Interpipe-მა 602 ათასი ტონა მილისა და 174 ათასი ტონა სარკინიგზო პროდუქცია გაყიდა.
აპრილის დასაწყისიდან ვიქტორ პინჩუკის Interpipe-ის ქარხნებმა დნიპროში, ნიკოპოლსა და ნოვომოსკოვსკში მუშაობა განაახლეს.
Forbes 2022-ის რეიტინგში ვიქტორ პინჩუკი 1,9 მლრდ დოლარის ქონების მფლობელია. ის უკრაინის ყოფილი პრეზიდენტის, ლეონიდ კუჩმას სიძე და კომპანია Interpipe-ის დამფუძნებელია. პინჩუკმა თებერვლის ბოლოდან 700 მლნ დოლარი დაკარგა.
სარკინიგზო ბორბლები
