რუსულმა ძალებმა ქალაქი სლავუტიჩი დაიკავეს, - ამის შესახებ ქალაქის მერი, იური ფომიჩოვი აცხადებს, რომლის კომენტარსაც უკრაინული მედია აქვეყნებს.

როგორც ფომიჩოვი ამბობს, ქალაქი რუსული შეიარაღებული ფორმირებების მიერაა ოკუპირებული. ქალაქში სამი მშვიდობიანი მოქალაქე დაიღუპა. ახლა მიმდინარეობს მოლაპარაკებები ოკუპანტებთან, რათა მშვიდობიანი მოსახლეობის ევაკუაცია განხორციელდეს.

"სლავუტიჩი დღეიდან ოკუპირებულია. ჩვენ მტკიცედ ვიცავდით ჩვენს ქალაქს, 3 დღის წინ მივიღეთ ულტიმატუმი ქალაქის უბრძოლველად ჩაბარების შესახებ, მაგრამ ჩვენმა სამხედროებმა, ეროვნულმა პოლიციამ, მიიღეს გადაწყვეტილება ქალაქის დაცვის შეშესახებ. სხვანაირად არ შეეძლოთ, ისინი სამხედროები არიან," - განაცხადა ქალაქის მერმა.

სლავუტიჩის დაკარგვის მიუხედავად, უკრაინელმა სამხედროებმა ქალაქი ტროსტიანეცი ოკუპანტებისგან გაათავისუფლეს, - ამის შესახებ ინფორმაციას 93-ე მექანიზებული ბრიგადა ცივი იარი „ფეისბუქზე“ ავრცელებს. ტროსტიანეცის გათავისუფლების შესახებ ინფორმაცია სუმის ოლქის სამხარეო სამხედრო ადმინისტრაციის ხელმძღვანელმა, დიმიტრი ჟივიცკიმაც დაადასტურა.

93-ე მექანიზებული ბრიგადა ცივი იარი  აცხადებს, რომ  ქალაქიდან რუსული ჯარის „ელიტის“ - კანტემიროვის სატანკო დივიზია გააქციეს.

"დღეს ტერიტორიული თავდაცვის და ადგილობრივი პარტიზანი მებრძოლების დახმარებით, სუმის ოლქის ქალაქი ტროსტიანეცი გავათავისუფლეთ რუსული საოკუპაციო ძალისგან. რუსულმა არმიამ რამდენიმე წარუმატებლობა განიცადა და გაიქცა. მათ ტროსტიანეცში დატოვეს იარაღი, აღჭურვილობა და საბრძოლო მასალა," - აცხადებენ „ცივ იარში“.

უკრაინელმა სამხედროებმა ზაპოროჟიეს ოლქის ქალაქებიც, პოლტავკა და მალინივკიც, გაათავისუფლეს ოკუპაციისგან,- ამაზეც უკრაინული მედია იუწყება.

CNN-ის ინფორმაციით, რამდენიმე ვიდეოს გადამოწმების შედეგად აღმოჩნდა, რომ უკრაინულმა ჯარებმა კონტროლი აღადგინეს სუმის ოლქის რამდენიმე სოფელზე, ისევე როგორც ვილხივკას დასახლებაზე, რომელიც უკრაინის ჩრდილო-აღმოსავლეთში, რუსეთის საზღვრიდან დაახლოებით 32 კილომეტრში მდებარეობს.