სოციოლოგიური ჯგუფის „რეიტინგის“ მიერ 18 მარტს ჩატარებული გამოკითხვის მიხედვით, უკრაინელთა 93%-ს სჯერა, რომ უკრაინა რუსეთის თავდასხმის მოგერიებას შეძლებს.

გამოკითხულთა ნახევარი – 47% იმედოვნებს, რომ უკრაინა შეძლებს რუსეთთან ომის მოგებას უახლოეს რამდენიმე კვირაში, 23%-ს კი სჯერა, რომ ომი რამდენიმე თვეს გაგრძელდება, 12% ფიქრობს, რომ ომი დასრულდება ექვს თვეში ან ერთ წელიწადში ან მეტხანში, 17%-ს კითხვაზე პასუხის გაცემა გაუჭირდა.

ამავე გამოკითხვით, ზელენსკის უშუალო მოლაპარაკებებს ვლადიმერ პუტინთან ომის დასრულებაზე მხარს უჭერს 74%, მეოთხედი კი – არა.

ამავდროულად, რუსეთთან დროებითი ზავის გაფორმებას უკრაინის ტერიტორიიდან მისი ჯარების გაყვანის გარეშე, გამოკითხულთა 89%-ის აზრით მიუღებელია.

რაც შეეხება უკრაინის ალიანსებში გაწევრიანებას, უკრაინის, პოლონეთის და დიდი ბრიტანეთის სამხედრო-პოლიტიკური ალიანსის შექმნის მხარდაჭერა 61%-დან (იანვარში) 85%-მდე გაიზარდა. დღეს ასეთი ალიანსის მხარდაჭერა უფრო მაღალია, ვიდრე უკრაინის ნატო-ში ინტეგრაციის მხარდაჭერა (72%).

გამოკითხულთა 44% მიიჩნევს, რომ უკრაინა აუცილებლად უნდა შევიდეს ნატო-ში, 42% -ს აზრით კი, უკრაინამ უნდა გააგრძელოს თანამშრომლობა ნატო-სთან, მაგრამ არ გახდეს გაერთიანების წევრი.

გამოკითხვა ჩატარდა სოციოლოგიური ჯგუფის „რეიტინგის“ მიერ 18 მარტს უკრაინის ყველა რეგიონში, გარდა დროებით ოკუპირებული ყირიმისა და დონბასის ტერიტორიებისა. სატელეფონო ინტერვიუს გზით გამოიკითხა 18 წელს ზემოთ ასაკის 1000 ადამიანი. ცდომილება არის 3.1%.