უკრაინიდან საქართველოს მიმართულებით საბორნე გადაზიდვები ჯერჯერობით შეჩერებულია, თუმცა რუსეთიდან ტვირთები ჩვეულებრივ მოძრაობს და მარაგის პრობლემა არ იქნება. ამის შესახებ ,,კომერსანტთან“ დისტრიბუტორთა ასოციაციის ხელმძღვანელი ივა ჭყონია აცხადებს.

მისი თქმით, პანიკის საფუძველი ჯერჯერობით არ არის და თამამად შეიძლება თქმა, რომ დახლებზე რაიმე პროდუქტის დეფიციტი არ შეიქმნება.

,,რუსეთიც და უკრაინაც ჩვენი სავაჭრო პარტნიორები არიან და მნიშვნელოვანია, რომ გადაზიდვებში პრობლემა არ გაჩნდეს. ამ ეტაპზე ისეთი სიტუაცია არ არის, რომ რაღაც პროდუქცია არ შემოდიოდეს, პანიკის საფუძველი ნამდვილად არ არის. ყველაზე პრობლემურია ის გარემოება, რომ არავინ იცის, კონფლიქტი რამდენ ხანს გაგრძელდება. პარალელი შეიძლება გავავლოთ 2008 წლის ომთან, მაშინაც სავაჭრო ურთიერთობები დროებით შეჩერებული იყო, მაგრამ მარტო რუსეთის მიმართულება.  რისკი, რომ იმპორტში წყვეტა გვქონდეს,  არ იკვეთება. ამ ეტაპზე  უწყვეტი ჯაჭვი მუშაობს და ჩვეულებრივ ვაგრძელებთ მხარეებთან თანამშრომლობას.  რაც შეეხება უკრაინიდან ტვირთების მოძრაობას,  საბორნე გადაზიდვები შეჩერებულია, მაგრამ ესეც დალაგდება. სავარაუდოდ ორშაბათიდან განახლდება, მთავარია კონფლიქტი მალე დასრულდეს და პანიკა ავიცილოთ“, - ამბობს ივა ჭყონია.

მისი თქმით, ამ ეტაპზე ერთ-ერთი დიდი პრობლემა ლარის კურსია, რამაც შეიძლება პროდუქტის გაძვირება გამოიწვიოს. თუმცა რა მაჩვენებლით მოიმატებს ფასი, ჭყონია ჯერჯერობით ვერ აკონკრეტებს.

რაც შეეხება ლარის კურსს, შეგახსენებთ, რომ ლარი გაუფასურებას აგრძელებს.  ეროვნული ბანკის მიერ გამოქვეყნებული მონაცემების თანახმად, 1 აშშ დოლარის ოფიციალური ღირებულება 3.1540 ლარია.

,,ბლუმბერგის“ სავაჭროი პლატფორმაზე 1 დოლარი ამ დროისთვის 3.1300 ლარად ივაჭრება.

მარი ჩიტაია