უკრაინის ეროვნულმა ანტიკორუფციულმა ბიურომ უკრაინელი ოლიგარქის იგორ კოლომოისკის სახლი გაჩხრიკა. უკრაინული მედიის ინფორმაციით, სახლიდან ამოღებულია გარკვეული სახის დოკუმენტები და კომპიუტერული ტექნიკა. ჩხრეკა კომპანია უკრნაფტის 13 მილიარდი გრივნას ქონებისა და სახსრების მითვისების ფაქტზე ჩატარდა.

თვითმხილველების თქმით, საგამოძიებო უწყების წარმომადგენლები ოლიგარქის საცხოვრებელ სახლს დილის ხუთ საათზე ესტუმრნენ.

აღსანიშნავია, რომ რამდენიმე კვირის უკან უკრაინული მედია წერდა, რომ ქვეყნის პრეზიდენტმა ვოლოდიმირ ზელენსკიმ იგორ კოლომოისკის უკრაინის მოქალაქეობა ჩამოართვა.

შეგახსენებთ, რომ კოლომოისკიმ ქონება 1990-იანი წლების დასაწყისში, ერთ-ერთი პირველი კომერციული ბანკის PrivatBank-ის დაფუძნებით დააგროვა. ბანკი უკრაინის წამყვანი ფინანსური ინსტიტუტი იყო და მასზე უკრაინის დეპოზიტების ⅓ მოდიოდა.

2016-ში კი ფულის გათეთრების სქემის გამოვლენის საბაბით, მთავრობამ მასში სპეციალური მართვა დააწესა და ბანკის სრული ნაციონალიზაცია მოახდინა. ამ პერიოდისთვის კოლომოისკისა და პეტრო პოროშენკოს შორის ურთიერთიერთობა უკვე დაძაბული იყო, მას 2015 წლის მარტში დნეპროპეტროვსკის ოლქის გუბერნატორის თანამდებობის დატოვება მოუწია. 2019 წლის მაისამდე კოლომოისკი შვეიცარიაში ცხოვრობდა, ვოლოდომირ ზელენსკის არჩევის შემდეგ კი, უკრაინაში დაბრუნდა.

იგორ კოლომოისკის სახელს უკავშირდება კიდევ უკრაინის საერთაშორისო ავიახაზები —FlyUIA.

როგორც ცნობილია სსრკ-ს დაშლის შემდეგ უკრაინის სახელმწიფო ავიაკომპანია Ukraine Airlines-ი ჩამოყალიბდა, რომლის ბაზაზეც შემდგომ კერძო კაპიტალის ჩართულობით Aerosvit Airlines-ი და FlyUIA შეიქმნა.

Ukraine Airlines-მა ოპერირება 2004 წელს ფინანსური პრობლემების გამო შეწყვიტა.

Aerosvit-მა კი გაკოტრების პროცედურები 2012 წლის ბოლოს დაიწყო. FlyUIA-ს მაჟორიტარული პაკეტი, აქციების 61.58%-ი 2011 წელს გასხვისდა. შესაბამისად ავიაკომპანიის ახალი მფლობელები Aerosvit-ის ყოფილ მფლობელებთან, არონ მაიბერგთან და იგორ კოლომოისკისთან დაკავშირებული კომპანიები გახდნენ.