უკრაინის გენერალურმა პროკურორმა, ირინა ვენედიქტოვამ მიხაილ ფრიდმანის 420 მლნ დოლარის აქტივების დაპატიმრების შესახებ განცხადება თავის Facebook გვერდზე გაავრცელა. ეს აქტივები Alfa-Bank-ის უკრაინის ფილიალში ინახებოდა.
„ფრიდმანი და მის მიერ კონტროლირებადი ბიზნესმენები ბანკს და კვიპროსულ კომპანიებს შესაძლო სანქციებისა და სხვა იძულებითი ღონისძიებების არიდების მიზნით თანხების მისაზიდად იყენებდნენ,“ - წერს ვენედიქტოვა.
მისი თქმით, „დაპატიმრებულია ბიზნესმენთან აფილირებული კვიპროსული კომპანიების ფასიანი ქაღალდები, რომლებიც საბანკო ანგარიშებზე ინახებოდა.“
უკრაინის გენერალური პროკურორი განმარტავს, რომ, ასევე, დააკავეს Alfa-Bank-ის უკრაინის ფილიალის ანგარიშებზე არსებული 469 მლნ გრივნა (15,9 მლნ დოლარი), რასაც, გამოძიების თანახმად, „კაპიკების ღირებულების საწესდებო კაპიტალის მქონე კომპანიის კოსმოსური თანხით შესყიდვის გზით რუსეთში გასატანად ამზადებდნენ.“
აპრილში უკრაინის უმაღლესმა რადამ დაამტკიცა კანონპროექტი, რომელიც სანქციების ქვეშ მყოფი რუსების აქტივების კონფისკაციის პროცედურას ამარტივებს. 11 მაისს პრეზიდენტმა, ვოლოდიმირ ზელენსკიმ პარლამენტში ცვლილებები შეიტანა, რომელიც ითვალისწინებს რუსეთთან დაკავშირებული აქტივების კონფისკაციას საომარი მდგომარეობის გასვლიდან ექვსი თვის განმავლობაში. მანამდე უკრაინის პრემიერ-მინისტრმა, დენის შმიგალმა თავის Telegram არხზე დაწერა, რომ მთავრობა მთელ რუსულ აქტივებს სახელმწიფო კომპანია „ეროვნულ საინვესტიციო ფონდს“ გადასცემს.
12 მაისს უკრაინამ მიიღო გადაწყვეტილება ქვეყანაში VEB.RF-ისა და Sberbank-ის შვილობილი კომპანიების აქტივების იძულებით ჩამორთმევის შესახებ. მანამდე უკრაინის ეროვნულმა ბანკმა მთავრობას შესთავაზა, ბაზრიდან გატანილი „საერთაშორისო სარეზერვო ბანკისა“ და „პრომინვესტბანკის“აქტივები სახელმწიფოს სასარგებლოდ იძულებით ამოეღო.