დიდი ბრიტანეთის პრემიერ-მინისტრი ბორის ჯონსონი აცხადებს, რომ უკრაინაში რუსეთის გამარჯვებას მაღალი ფასი ექნება. აღნიშნულის შესახებ დიდი ბრიტანეთის პრემიერმა „დიდი შვიდეულის“ სამიტზე მიცემული ინტერვიუს დროს განაცხადა.
მისი თქმით, მსოფლიო ლიდერებმა უნდა გააცნობიერონ უკრაინის მხარდაჭერის ფასი, მათ შორის ენერგიაზე და საკვებზე ფასის მომატება, თუმცა ასევე უნდა გააცნობიერონ, რომ რუსეთის გამარჯვების ფასი გაცილებით მაღალი იქნება.
„თქვენ იცით, გვაქვს ჩვენი გაზის ოთხი პროცენტი რუსეთიდან. გერმანიაში ეს არის 40 პროცენტი. ისინი რეალური ზეწოლის ქვეშ არიან. მათ ენერგია სხვაგან უნდა მოიპოვონ, ისინი ამას აკეთებენ. ისინი იღებენ მსხვერპლს, რადგან ხედავენ, რომ თავისუფლების ფასის გადახდა ღირს. არ უნდა მოხდეს ისეთი დამოუკიდებელი, სუვერენული ქვეყნის ძალადობრივი ოკუპაცია, როგორიც უკრაინაა და არ უნდა შეიცვალოს მისი საზღვრები ძალის გამოყენებით. ამის შედეგები, რაც ხდება მსოფლიოში, მძიმეა, მაგრამ უკან დახევის ფასი, პუტინისთვის წარმატების მიღწევის მიცემის ფასი, უკრაინისთვის უზარმაზარი ნაწილების ჩამოჭრის, მისი დამპყრობლური პროგრამის გაგრძელების ფასი, ბევრად მაღალი იქნება. აქ ეს ყველას ესმის“, – განაცხადა ბრიტანეთის პრემიერმა.
ამასთან, ბორის ჯონსონის თქმით, უკრაინის მხარდასაჭერად აუცილებელია ერთიანობის შენარჩუნება და ლიდერებმა უნდა განაგრძონ საკუთარი ძალისხმევა, რადგან მოსახლეობასა და პოლიტიკოსებში შესაძლოა, ომის თემამ დაღლილობა გამოიწვიოს.
„ჩვენ აქ ვართ გერმანიაში, მსოფლიოს უმდიდრესი ქვეყნებთან ერთად, აქცენტს ვაკეთებთ უკრაინაზე და იმაზე, როგორ შევინარჩუნოთ უკრაინის მხარდამჭერი კოალიცია ერთად იმ დროს, როდესაც, მოგეხსენებათ, რეალურად, იქნება დაღლილობა მოსახლეობაში და პოლიტიკოსებში. ყველაზე წარმოუდგენელი რამ, თუ როგორ უპასუხა დასავლეთმა პუტინის მიერ უკრაინაში შეჭრას – ეს იყო ერთიანობა. მოგეხსენებათ, ნატო იყო მტკიცე, დიდი შვიდეული იყო მტკიცე და ჩვენ კვლავაც მტკიცენი ვართ. მაგრამ ამ ერთიანობის დასაცავად, იმისთვის, რომ ამან იმუშაოს, ნამდვილად უნდა გქონდეთ გულწრფელი დისკუსიები იმის შესახებ, თუ რა ხდება, ზეწოლაზე, რომელსაც განიცდიან მეგობრები და პარტნიორები ინდივიდუალურად, განიცდის მოსახლეობა, იქნება ეს ენერგიაზე, საკვებზე, თუ სხვა რამეზე ხარჯების ზრდა. ასე რომ, მხოლოდ ერთად გადაწყვეტილებების მოძიებით შეგიძლიათ, შეინარჩუნოთ ეს ერთიანობა და გააგრძელოთ წინსვლა“, – განაცხადა ბორის ჯონსონმა.
ბორის ჯონსონი
