უკრაინის წინააღმდეგ ომში მონაწილე ყოფილი რუსი ჯარისკაცები რუსეთის სკოლებში საბაზისო, დაწყებითი სამხედრო მომზადების გაკვეთილებს ჩაატარებენ. ამისათვის მათ შესაბამისი გადამზადება უნდა გაიარონ. ამის შესახებ განცხადება რუსეთის განათლების მინისტრმა სერგეი კრავცოვმა რუსულ ტელეარხ НТВ-ზე გააკეთა.
„მათ, ვინც შეასრულებს თავის სამოქალაქო მოვალეობას სპეციალური სამხედრო ოპერაციის ფარგლებში, შეუძლიათ ასწავლონ სკოლაში, მაგრამ ამისთვის შესაბამისი გადამზადება უნდა გაიარონ“, - თქვა კრავცოვმა.
შეგახსენებთ, რომ 2022 წლის დეკემბერში რუსეთის ფედერაციის განათლების სამინისტრომ დაამტკიცა ფედერალური საგანმანათლებლო პროგრამა რუსული სკოლებისთვის, რომლის ფარგლებშიც დაინერგა მოდული „საბაზისო სამხედრო მომზადების ელემენტები“. პროგრამის განხორციელება 2023 წლიდან დაიწყება.