ცხოველების და ფრინველების საკვების მწარმოებელ კომპანიებს უკრაინაში მიმდინარე ომის, ასევე ლარის მკვეთრი გაუფასურების გამო მთელი რიგი ცვლილებების განხორციელება უწევთ. იმის გამო, რომ უკრაინიდან სოიას იმპორტი გაჩერდა, კომპანიები ალტერნატიულ გზებს ეძებენ. როგორც ,,ნუტრიმაქსის“ ბიზნესის განვითარების მენეჯერი რევაზ ლაფაჩი  ,,კომერსანტთან“ ამბობს, ნედლეულის დეფიციტი მოსალოდნელი არ არის, თუმცა სხვადასხვა ფაქტორების გამო,  ფასი იზრდება.

,,უკრაინაში მიმდინარე საომარი მოქმედებების,  ლარის კურსის მკვეთრი გაუფასურებისა და პროტეინის წყაროებზე გაზრდილი ფასების ფონზე, გაიზარდა ცხოველებისა და ფრინველების საკვების ფასიც.  კურსთაშორისი სხვაობა საკმაოდ დიდია, უკვე ლარის კურსი დოლართან მიმართებაში 3,40-ს გასცდა.

სოია ძვირდება, პროტეინის (ცილის წყარო) ფასი იზრდება არა მარტო აქ, შავი ზღვის რეგიონში, არამედ ზოგადად მთელ მსოფლიოში. ეს ეხება  -  როგორც სამხრეთ, ისე ჩრდილოეთ ამერიკიდან შემოტანილ პროდუქტებსაც. უკრაინული სოია, რომლითაც რეგიონი მარგდებოდა, ლოგისტიკის ერთიანი ჯაჭვიდან ამოვარდა და არავინ იცის, როგორ განვითარდება მოვლენები. მიმდინარე პერიოდში ნედლეულის მომწოდებლების დივერსიფიკაციითა და თვითღირებულების ოპტიმიზაციით, მაქსიმალურად ვცდილობთ ნეგატიური ფაქტორების გავლენა შევამციროთ ჩვენს სექტორში“,  - ამბობს ,,კომერსანტთან“ რევაზ ლაფაჩი.

მისი თქმით, მიმდინარე საომარი მოქმედებების გამო უკრაინაში სასოფლო-სამეურნეო სამუშაოები, დიდი ალბათობით,  შეფერხდება, განსაკუთრებით კი ხვნა-თესვა. შესაბამისად, უკრაინული პროდუქტი არ იქნება ხელმისაწვდომი, რაც  შავი ზღვის და ხმელთაშუა ზღვის ქვეყნებზე მკვეთრად ნეგატიურად იმოქმედებს.

 ,,პროგნოზის გაკეთება საკმაოდ რთულია, ბიზნესი კი გაურკვევლობაშია.  ვფიქრობთ შესაძლო ალტერნატივაზე.  სოიას ძირითადი მომწოდებელი გლობალურ ბაზრებზე სამხრეთ და ჩრდილოეთ ამერიკაა, ჩვენი რეგიონისთვის კი უკრაინა, რომელიც დღეს ჩაკეტილია. ომის გამო მთელ ლოგისტიკურ არხებს ექმნება პრობლემა. თუ საგაზაფხულო სამუშაოები ჩავარდება, უკრაინა სოიას მოსავლის გარეშე დარჩება,  რაც კიდევ უფრო გააუარესებს მდგომარეობას.
ჩვენი ცოდნა და ბაზრის დივერსიფიკაცია არის ის, რითაც ამ ეტაპზე ვპასუხობთ გამოწვევებს.  პროდუქციის ფასებმა უკვე მოიმატა, თუმცა ჩვენ მაქსიმალურად ვცდილობთ ნაკლები დარტყმა მიიღოს სექტორმა. ყოველდღიურად ვაკვირდებით, ვაანალიზებთ სიტუაციას და შესაბამისად ვიღებთ გადაწყვეტილებებს.   არსებული მარაგებითა და დალაგებული ლოგისტიკით შეგვიძლია ჯერ კიდევ დავიცვათ ბაზარი“, - ამბობს რევაზ ლაფაჩი ,,კომერსანტთან“. 

ცნობისთვის, „ნუტრიმაქსი“ 2009 წელს დაარსდა და ის პირველი კომპანიაა საქართველოში, რომელიც ცხოველთა და ფრინველთა საკვებს ინდუსტრიულად აწარმოებს.

კომპანიის მისიაა მაღალხარისხიანი პროდუქციის, თანამედროვე ტექნოლოგიებისა და კვალიფიციური კონსულტაციების მიწოდების საშუალებით, განავითაროს ფერმერული მეურნეობები საქართველოში. კომპანია დაარსების დღიდან ჰოლანდიური მსხვილი ჰოლდინგის წევრის — Trouw Nutrition-ის ოფიციალური პარტნიორია, რომელსაც ცხოველთა საკვებისა და დანამატების წარმოებაში მსოფლიოში ლიდერის პოზიცია უკავია. 

მარი ჩიტაია