ევროპაში მარილის უმსხვილესმა უკრაინულმა მწარმოებელმა, სახელმწიფო საწარმო „არტემსოლმა“ მუშაობა გაურკვეველი ვადით შეაჩერა. ამის შესახებ საწარმოს დირექტორის მოვალეობის შემსრულებელმა, ვიქტორ იურინმა „ვილნეს რადიოს“ განუცხადა, რასაც „ინტერფაქს-უკრაინა“ ავრცელებს.
„არტემსოლი“ დონეცკის ოლქის ქალაქ სოლედარში მდებარებს, სადაც რუსული საოკუპაციო ჯარები ინტენსიურ საომარ მოქმედებებს აწარმოებენ. ვიქტორ იურინის ცნობით, მუდმივი დაბომბვის გამო, საწარმო ბრძანების საფუძველზე არ მუშაობს და განუსაზღვრელი ვადით უმოქმედოთაა. ნაწილობრივ დანგრეულია სათაო ოფისის შენობა, იყო პირდაპირი დარტყმები მარილის მაღაროებსა და მასალის საწყობზეც.
„წარმოების პროცესი შეუძლებელია. ჩვენ ადამიანებს საფრთხეში ვერ ჩავაგდებთ. მეტიც, სოლედარში მცხოვრებთა უმეტესობა, რომელიც „არტემსოლის“ თანამშრომელია, უკვე ევაკუირებულია,“ - აცხადებს საწარმოს ხელმძღვანელი.
მისი თქმით, „არტემსოლმა“ მუშაობა ჯერ კიდევ აპრილში, ოლქის რკინიგზის გათიშვის გამო შეწყვიტა და ექსპორტისთვის ხელმისაწვდომი ყველა მარაგი საცალო ქსელებში აპრილშივე გაიგზავნა. „არტემსოლი“ პროდუქციას ძირითადად რკინიგზით გადაზიდავდა, ხოლო საავტომობილო გზით მხოლოდ მცირე მოცულობის ექსპორტი ხდებოდა.
ვიქტორ იურინის ცნობით, საწარმოს პერსონალი საომარი მოქმედებების დროს არ დაშავებულა, თუმცა რამდენიმე თანამშრომელი მათი სახლების დაბომბვის შედეგად დაშავდა. იურინი ამბობს, რომ საწარმოს დახურვის გამო, საომარი მოქმედებების დასრულებამდე, უკრაინას თურქეთიდან, რუმინეთიდან და საზღვარგარეთის სხვა ქვეყნებიდან მარილის იმპორტის გაზრდა მოუწევს.
„არტემსოლი“ სუფრის მარილის მოპოვებისა და რეალიზაციის ერთ-ერთი უმსხვილესი სახელმწიფო საწარმოა ცენტრალურ და აღმოსავლეთ ევროპაში. 2021 წლის იანვარ-სექტემბერში კომპანიამ 43 მლნ გრივნის (1,462,450.25 დოლარის) სუფთა მოგება მიიღო, რაც 2020 წლის ანალოგიურ პერიოდს 5,8-ჯერ აღემატება, ხოლო შემოსავალი გაორმაგდა და 1,28 მლრდ გრივნას (43,534,594.34 დოლარს) მიაღწია.
2020 წლის ბოლოს „არტემსოლმა“ მარილის წარმოება, 2019 წელთან შედარებით, 41%-ით, 1,18 მილიონ ტონამდე შეამცირა, რისი მიზეზიც უამინდობა, კარანტინი და მსოფლიო ბაზრებზე გაზრდილი კონკურენცია იყო.
bpn.ge