უკრაინაში „სანავთობო ბოიკოტი“ პირველებმა ავტოგასამართი სადგურების ქსელებმა ОККО, WOG, SOCAR და KLO-მ დაიწყეს, ამის მიზეზი მთავრობის მიერ მიღებული დადგენილება გახდა, რომელიც კარანტინის პერიოდში საწვავის ფასების რეგულირებას გულისხმობს. შემდეგ მათ სხვა კომპანიებიც შეუერთდნენ, თუმცა, ქვეყნის ტერიტორიაზე ბენზინის და დიზელის გაყიდვების სრულ შეჩერებამდე საქმე არ მისულა. ბოიკოტი ამ ეტაპზე საწვავის რამდენიმე ძირითად და ყველაზე მოთხოვნად, მაგრამ არა ყველა სახეობას შეეხო.
ბოიკოტის პერიოდში კომპანიები მყიდველების მოზიდვას სხვადასხვა ფასდაკლებებით არ გეგმავენ.
SOCAR-ის Facebook გვერდზე ნათქვამია, რომ კომპანია არ ეთანხმება მინისტრთა კაბინეტის გადაწყვეტილებას, რომელიც ბენზინზე და დიზელზე ფასნამატის მაქსიმალური ლიმიტის შემოღებას გულისხმობს.
„ჩვენ იძულებულები ვართ საწვავის რამდენიმე სახეობის გაყიდვები შევაჩეროთ და მთავრობის მხრიდან ახსნა-განმარტებებს დაველოდოთ. ასევე შექმნილ ვითარებაში ჩვენ მომხმარებლებისთვის სხვადასხვა სახის ფასდაკლებებს და აქციების დროებით ვწყვეტთ“, - იუწყება აზერბაიჯანული კომპანიის უკრაინული ფილიალი.
მსგავსი გადაწყვეტილება სხვა მსხვილმა ქსელებმაც მიიღეს. კერძოდ, კომპანია KLO-ს ინფორმაციით, მთავრობის გადაწყვეტილების მოქმედების პერიოდში ბენზინის და დიზელის რამდენიმე სახეობის გაყიდვები შეწყდება, ასევე სტანდარტული და დამატებითი შეღავათების სისტემაც დროებით უქმდება.
14 მაისს უკრაინის მთავრობამ კარანტინის პერიოდზე საწვავზე ფასების რეგულირების გადაწყვეტილება მიიღო. მის თანახად, საცალო ვაჭრობაში საწვავზე ფასნამატი გარკვეულ საზღვარს არ უნდა აღემატებოდეს. ბენზინის და დიზელის სხვადასხვა სახეობაზე ფასნამატიც განსხვავებულია.
შესაბამისად, საწვავზე ფიქსირებული ფასების შემოღება მოხდა და ნავთობკომპანიების პროტესტი სწორედ ამან გამოიწვია, მათ საწვავის რამდენიმე სახეობის გაყიდვა შეამცირეს, რადგანაც მათი ინფორმაციით, ახალი ფასების პირობებში ეს წამგებიანია.
მთავრობის გადაწყვეტილება ასევე გააპროტესტა ევროპულმა ბიზნეს-ასოციაციამ, რომელიც ფასების რეგულირების გაუქმებას ითხოვს.
„ეს გადაწყვეტილება მცდარია და ის ვითარებას უკრაინის საწვავის ბაზარზე არათუ არ გააუმჯობესებს, არამედ გააუარესებს, ფასების რეგულირების გამო ბიზნესი შესაძლოა ჩრდილში გადავიდეს, ხოლო ქვეყანაში საწვავის შავი ბაზარი გაჩნდეს“ - თვლის ასოციაცია.
საწვავზე ფასების რეგულირების ინიციატორი უკრაინის პრეზიდენტის ადმინისტრაცია გახდა და ეს საკითხი ჯერ კიდევ აპრილში განიხილებოდა. მაშინ ნავთობინდუსტრიის წარმომადგენლებმა ამ იდეის მავნებლობაში მთავრობის დარწმუნება შეძლეს და ფასების ზრდის შეკავებასთან დაკავშირებით ხელისუფლებასთან არაფორმალურ შეთანხმებას მიაღწიეს.
თუმცა, ეს გარიგება გათვლილი იყო აპრილზე, მაისში კი ნავთობკომპანიებმა ფასები ერთბაშად გაზარდეს. ამის საპასუხოდ, უკრაინის მინისტრთა კაბინეტმა აპრილში დაწუნებული რეგულაცია მაინც მიიღო.
glavred.info
თენგიზ აბლოთია