რუსეთის მიერ უკრაინაში ფართომასშტაბიანი შეჭრის დაწყების შემდეგ, საქართველოში კერძო სექტორის ნაწილი მზაობას გამოთქვამს, შეიფარონ როგორც საქართველოში დარჩენილი უკრაინის მოქალაქეები, ასევე მიიღონ ომის მსხვერპლი ადამიანები უკრაინიდან საკუთარი განთავსების ობიექტებში.
,,მგზავრები ჯგუფის“ დამფუძნებელი და ,,თბილისი ცენტრალის“ დირექტორი ლევან ყარალაშვილი ,,ბიზნესპრესნიუსთან" ამბობს, რომ უკვე განხორციელდა პირველი ზარები, უკრაინელების მხრიდან და რამდენიმე საათში ეყოლებათ პირველი სტუმრები.
,,ამ ეტაპზე, ინიციატივა შეეხებათ უკრაინის იმ მოქალაქეებს, რომლებიც საქართველოში არიან დარჩენილი და ვერ ახერხებენ უკან სამშობლოში დაბრუნებას. მათ ჩვენ შევთავაზეთ ჩვენი სასტუმროს ნომრები და საჭიროების მიხედვით, თუ რომელი რეგიონის სასტუმროში ექნებათ საჭიროება, იქ განვათავსებთ. უკვე შემოვიდა ზარები თბილისი ცენტრალის სასტუმროში და უახლოეს საათებში იქ გვეყოლება პირველი უკრაინელი სტუმრები.
ასევე, სულ მალე, ასოციაცია გაავრცელებს განცხადებას, რომ სასტუმრო სექტორი მზად არის ომის მსხვერპლი ადამიანების მისაღებადაც უკრაინიდან. მათ, ჩვენ შევთავაზებთ დროებით თავშესაფარს ჩვენი განთავსების ობიექტებში“, - განაცხადა ლევან ყარალაშვილმა ,,ბიზნესპრესნიუსთან“.
,,ლელო საქართველოს“ კვოტით ბათუმის საკრებულოს დეპუტატის, ირაკლი კუპრაძის სოციალურ ქსელში დაწერილი პოსტის მიხედვით კი, სასტუმრო ქსელი ,,მგზავრების“ გარდა, უკრაინის მოქალაქეების მისაღებად მზად არიან, რჩეული მარანი თელავში 30 ნომრით და სასტუმრო ,,Best hotel” თბილისში.
ცნობისათვის, კიევის, ბორისპოლის საერთაშორისო აეროპორტმა მუშაობა შეაჩერა. ფრენები შეჩერდა უკრაინის თითქმის ყველა აეპოროტიდან, დაიხურა უკრაინის საჰაერო სივრცე სამოქალაქო ავიაციისთვის.
bpn.ge