ეკონომიკური გაჯანსაღების ფონზე, 2021 წლის მესამე და მეოთხე კვარტლებში შრომის ბაზრის მაჩვენებლების გაუმჯობესება დაფიქსირდა. ამის შესახებ პრემიერის მიერ პარლამენტში წარდგენილ სამთავრობო პროგრამის შესრულების შესახებ მოხსენებაშია აღნიშნული.
კერძოდ, მოხსენების თანახმად, 2021 წლის მეოთხე კვარტალში, 2020 წლის მეოთხე კვარტალთან შედარებით, უმუშევართა რაოდენობა 5.2%-ით შემცირდა და 291.9 ათასი შეადგინა.
რაც შეეხება უმუშევრობის დონეს, როგორც დოკუმენტშია აღნიშნული, 2021 წლის მეოთხე კვარტალში 19%-ს გაუტოლდა, რაც 1.5 პროცენტით ნაკლებია წინა წელთან შედარებით.
„2021 წლის მესამე და მეოთხე კვარტალებში გაიზარდა, როგორც სამუშაო ძალის მონაწილეობის, ასევე დასაქმების მაჩვენებელი, კერძოდ, მეოთხე კვარტალში აქტივობის დონემ 51.2% შეადგინა, რაც 1.2 პროცენტული პუნქტით აღემატება წინა წლის ანალოგიურ პერიოდს, ხოლო დასაქმების დონე 1.7 პროცენტით გაიზარდა და 41.5 პროცენტი შეადგინა.
2021 წლის მესამე კვარტალში დასაქმებულთა რაოდენობა 12.1 ათასით, ხოლო მეოთხე კვარტალში − 46.3 ათასით გაიზარდა. დადებით ტენდენცია გაგრძელდა 2022 წლის პირველ კვარტალშიც: შემცირდა უმუშევრობა და გაიზარდა როგორც დასაქმების, ასევე აქტიურობის დონე.
2022 წლის პირველ კვარტალში, წინა წელთან შედარებით, უმუშევრობის დონე 2.5 პროცენტული პუნქტით შემცირდა და 19.4 პროცენტი შეადგინა, ხოლო დასაქმებულთა რაოდენობა 71.3 ათასით გაიზარდა,“- აღნიშნულია პრემიერის მოხსენებაში.
უმუშევართა რაოდენობა
