მთავრობა ახალ სსიპ-ს სარკინიგზო ტრანსპორტის სააგენტოს ქმნის, რომელიც სარკინიგზო სექტორს ზედამხედველობას და მონიტორინგს გაუწევს. პარლამენტში წარდგენილი კანონპროექტის განმარტებითი ბარათიდან ირკვევა, რომ 2023 წელს უწყების ბიუჯეტი 1.3 მლნ ლარი იქნება, ხოლო მისი შექმნა ევროკავშირთან ასოცირების დღის წესრიგს წარმოადგენს.
როგორც რადიო „კომერსანტის“ ეთერში სატრანსპორტო დერეფნის კვლევის ცენტრის ხელმძღვანელმა პაატა ცაგარეიშვილმა განაცხადა, პრობლემა რომელიც დღეს საქართველოს რკინიგზასთან და მსხვილ საწარმოებთან არსებობს, კონკურენციის არ არსებობაა და აუცილებელია ბაზარზე ოპერირებდნენ სხვა სარკინიგზო კომპანიები, რომელთა უფლებები გათანაბრებული იქნებოდა „საქართველოს რკინიგზის“ უფლებებთან.
„2017 წლიდან, 3 და 4 პრემიერი გვპირდებოდა, რომ აუცილებლად იყო გასატარებელი რეფორმა რკინიგზაში, რომელიც კონკურენტულ გარემოს შექმნიდა. კონკურენტული გარემო ნიშნავს იმას, რომ უცხოური იქნება კომპანია, თუ საქართველოში აღმოცენებული სარკინიგზო კომპანიას, პირობითად, თუ საკუთარი ვაგონები აქვს, შეეძლოს სარკინიგზო ქსელის გამოყენება, ისევე როგორც „საქართველოს რკინიგზას“, რომ ისინი იყვნენ თანაბარ პირობებში. იმისათვის, რომ კონკურენტული გარემო შეიქმნას“, - განაცხადა პაატა ცაგარეიშვილმა.
მისი თქმით, ამ რეფორმის განხორციელების საწყისი ეტაპი ნებისმიერი გარეშე კომპანიის სერტიფიცირების აუცილებლობაა. ამასთან ერთად, ინფრასტრუქტურის რგოლს, რომელიც რკინიგზას კურირებს, გავლილი უნდა ჰქონდეს ავტორიზაცია.
„სწორი ნაბიჯია გადადგმული, ამით ევროკავშირის დირექტივა განხორციელდება. პირველ რიგში, უსაფრთხოების კუთხით მნიშვნელოვანია, რომ ის კომპანიები, რომლებიც საქართველოში შემოვლენ, სერტიფიცირებული იყვნენ. ამავე დროს, ინფრასტრუქტურის რგოლს, რომელიც რკინიგზას კურირებს, გავლილი უნდა ჰქონდეს ავტორიზაცია. ეს 2 ფრაგმენტი - გადამზიდავების უსაფრთხოების სერტიფიცირება და ინფრასტრუქტურის ავტორიზაცია აუცილებლად გარეშე მეთვალყურე ორგანომ, ამ შემთხვევაში რკინიგზის მარეგულირებელმა ორგანომ უნდა განახორციელოს. ამ 2 პოსტულატის ამოქმედებით, 2016 წლის 798 დირექტივას შევასრულებთ, რომლის პასუხისმგებლობაც აღებული გვაქვს“, - განაცხადა პაატა ცაგარეიშვილმა.
მისი თქმით, ამ რეფორმის დაწყება დადებითად მოვლენაა, ეს არის დასაწყისი, რომელსაც იმპლემენტაცია, განხორციელება უნდა მოჰყვეს.