საქართველოს ეკონომიკისა და მდგრადი განვითარების მინისტრმა ლევან დავითაშვილმა კურორტების განვითარების გეგმაზე მუშაობა კიდევ ერთხელ, ამჯერად პარლამენტის ტრიბუნიდან დააანონსა. საქმე ის არის, რომ რამდენიმე თვეა შეიქმნა სსიპ კურორტების განვითარების სააგენტო, რომლის კომპეტენციაში იქნება კურორტებსა და საკურორტო ადგილებზე ინფრასტრუქტურის განვითარების ხელშეწყობა.

როგორც ჩანს, კურორტების განვითარების გეგმაზე, რაც მთავრობას აქვს გაწერილი, ან ახლა წერს, სექტორისთვის უცნობია.

„საერთოდ ინფორმაცია არ გვაქვს. ამბობენ, რომ გეგმა მალე იქნება. იმედია სამოქმედო გეგმას გააკეთებენ და გვეტყვიან რას აკეთებენ მინიმუმ 6 თვის განმავლობაში. მაგრამ მე არ მგონია რაიმე ქმედითი ნაბიჯი გადადგან. თუნდაც პრეზენტაციაში და დავალებაში რომ ეწეროთ, ესა თუ ის უნდა გაკეთდეს, არ ვარ დარწმუნებული, რომ ამას შეასრულებენ, რადგან კურორტებს მართავს ცალკე ორგანიზაცია, ზამთრის კურორტების განვითარების კომპანია და შეარულებენ მას“, - გვითხრა “ჰელისკი ჯორჯიას” დამფუძნებელმა ვატო ასათაშვილმა.

რაც შეეხება თავად სააგენტოს და მის საქმიანობას, ასათაშვილი ამბობს, რომ მათი დავალება რა იქნება, ძალიან ბუნდოვანია.

„ვფიქრობ, ეს არის ერთგვარი საინვესტიციო სააგენტო, რომელმაც უნდა გააკეთოს კურორტების გენგეგმა, და ამ გენგეგმის მიხედვით შეუდგეს საქმიანობას, მე ამას ვამბობ სპეკულაციების დონეზე, რადგან არანაირი ინფორმაცია საჯარო სივრცეში არ გამოდის. უპირველეს ყოვლისა, მნიშნელოვანია, რომ ამ ორგანიზაციამ თავისი მისიის შესახებ საჯაროდ განაცხადოს, რას აპირებენ, როგორც მინიმუმ ანგარიშვალდებულების კუთხით, საბიუჯეტო ორგანიზაცია შეიქმნა და რას აკეთებს? ანუ რაზე მუშაობს? იმის მიხედვით თავის გეგმას რომ გაგვაცნობენ, ვიტყვით კარგი გეგმა აქვთ, ცუდი თუ რა შეიძლება გაკეთდეს, აპრიორი შემიძლია გითხრათ, რომ ვერაფერ ქმედითს ესენი ვერ განახორციელებენ. უპირველეს ყოვლისა იმიტომ, რომ საერთოდ მზადაც არ არიან, როგორც ჩანს. ყველაზე ცუდი არის ის, რომ ეკონომიკის სამინისტრო და სააგენტოს ხელმძღვანელი ამ თემაზე არ საუბრობენ, აბსტრაქტულად, რაღაც სადღეგრძელოებით გვესაუბრებიან, ბიუჯეტი გამოიყო, ფულს ხარჯავენ და ის მაინც ხომ უნდა ვიცოდეთ, რაში ხარჯავენ?", - ამბობს ვატო ასათაშვილი.

წყარო: bm.ge