უნგრეთმა უკან წაიღო თავისი მოთხოვნა, ევროკავშირის სანქციების სიიდან ამოეღოთ სამი რუსი ოლიგარქი. ამის შესახებ რადიო თავისუფლების კორესპონდენტი იტყობინება დიპლომატიურ წყაროებზე დაყრდნობით.
წყაროებმა აღნიშნეს, რომ ბრიუსელში 7 სექტემბერს, ევროკავშირის ელჩების შეხვედრაზე უნგრეთის წარმომადგენლებმა თქვეს, რომ მზად არიან მხარი დაუჭირონ რუსი ბიზნესმენებისთვის სანქციების კიდევ ექვსი თვით გაგრძელებას. ამასთან, ბუდაპეშტმა განაცხადა, რომ შესაძლოა ეს საკითხი კვლავ დააყენოს რუსეთისთვის სანქციების შესაძლო გაგრძელების წინ, 2023 წლის მარტში.
რადიო თავისუფლების წყაროების თანახმად, ბუდაპეშტი ითხოვდა, სანქციების სიიდან ამოეღოთ ალიშერ უსმანოვი, პიოტრ ავენი და ვიქტორ რაშნიკოვი.
უსმანოვი და ავენი კრემლთან დაახლოებულ ოლიგარქებად ითვლებიან. ევროკავშირს მიაჩნია, რომ მათ მჭიდრო კავშირები აქვთ რუსეთის პრეზიდენტ ვლადიმირ პუტინთან.
მიმდინარე წლის მარტში სანქციების სიაში მოხვდა ასევე ვიქტორ რაშნიკოვი - გადასახადების ერთ-ერთი უდიდესი გადამხდელისა და სახელმწიფო ბიუჯეტის წყაროს, მაგნიტოგორსკის მეტალურგიული კომბინატის დირექტორთა საბჭოს თავმჯდომარე.
ევროკავშირმა 15 სექტემბრამდე უნდა მიიღოს გადაწყვეტილება მოსკოვისთვის სანქციების შემდგომი ექვსი თვით გაგრძელების თაობაზე. სანქციების სიაში 1200-ზე მეტი ფიზიკური პირი და 100-ზე მეტი კომპანიაა.
უნგრეთის პრემიერ-მინისტრი ვიქტორ ორბანი პრორუსული ორიენტაციის პოლიტიკოსად ითვლება. ის აკრიტიკებდა უკრაინის კონფლიქტთან დაკავშირებით მოსკოვის მიმართ ევროკავშირის პოლიტიკას. მისი თქმით, შემოღებული სანქციები ურტყამს თავად ევროკავშირს, არ ასუსტებს რუსეთს და არც კიევს ეხმარება. სხვათა შორის, უნგრეთი არ დათანხმდა თავისი ტერიტორიის გავლით უკრაინისთვის დასავლეთის სამხედრო დახმარების მიწოდებას.