„თბილისის ღია სასწავლო უნივერსიტეტი“ შპს „ველოქს ედიუქეიშენმა“ ორი წლის წინ იყიდა. „ველოქს ედიუქეიშენის“ დირექტორი „საქართველოს ბანკის“ დირექტორის ყოფილი მოადგილე რამაზ კუკულაძეა, კომპანიაში მისი ბიზნესპარტნიორები კი „საქართველოს ჯანდაცვის ჯგუფის“  ყოფილი CEO ნიკოლოზ გამყრელიძე, VTB ბანკის ყოფილი  CEO არჩილ კონცელიძე, ინვესტორთა საბჭოს სამდივნოს ყოფილი ხელმძღვანელი მარიამ მეღვინეთუხუცესი, ასევე „საქართველოს კაპიტალის“ დირექტორის მოადგილე ავთანდილ ნამიჩეიშვილი და „ლიბერთი ბანკის“ დირექტორის ყოფილი მოადგილე დავით წიკლაური არიან.

რამაზ კუკულაძემ უნივერსიტეტის ყიდვის შემდეგ „კომერსანტთან“ განმარტა, რომ „ღია უნივერსიტეტის“ შეძენით, ქართველ ბანკირებს სურთ სწავლის იმ თანამედროვე სისტემების დანერგვა, რაც დღევანდელ მსოფლიო რეალობაში აქტუალურია. „კომერსანტი“ დაინტერესდა, რა გაკეთდა ორი წლის განმავლობაში, რამდენად დიდია სტუდენტების მხრიდან უნივერსიტეტით დაინტერესება და რა გეგმები აქვთ სამომავლოდ.

„ალტე უნივერსიტეტის“ პრეზიდენტი რამაზ კუკულაძე „კომერსანტთან“ ამბობს, რომ პროცესები იმაზე უკეთესად განვითარდა, ვიდრე თავდაპირველად დაიგეგმა, სამომავლოდ კი „ალტე უნივერსიტეტის“ საერთაშორისო ბაზრებზე, განსაკუთრებით კი დასავლეთ ევროპის ქვეყნებში პოზიციონირების გაძლიერება იგეგმება.

„ამ ორი წლის განმავლობაში განვახორციელეთ უნივერსიტეტის რებრენდინგი და ახლა ის არის „ალტე უნივერსიტეტი“. ინტერნაციონალიზაციის პოლიტიკის მიმართულებით, ადრე გვყავდა სტუდენტები 3 ქვეყნიდან, დღეს კი უკვე 18 ქვეყნიდან გვყავს. ძირითადი ბაზარი მაინც ინდოეთია, თუმცა ძალიან ვამაყობთ, რომ დიდმა ბრიტანეთმა აღიარა ჩვენი სამედიცინო პროგრამა და მათგან სტუდენტების საკმაოდ დიდი ჯგუფი მივიღეთ, აქტიურად ვაპირებთ ამ ქვეყანასთან თანამშრომლობას. ასევე მაღალია დაინტერესება ისრაელიდან და ვგეგმავთ ქვეყნების კუთხით რაც შეიძლება დიდი დივერსიფიკაცია მოხდეს, მეტ უცხოურ ქვეყანას გავაცნოთ ჩვენი უნივერსიტეტი. გარდა ამისა 18 სტუდენტი გავუშვით უცხოეთში სასწავლებლად. 

„ალტე უნივერსიტეტი“ ჰარვარდის ბიზნეს სკოლის „მიკროეკონომიკისა და კონკურენციის პარტნიორთა ქსელის“ წევრი გახდა, ასევე ჩინეთთან და უკრაინასთან გვაქვს ერთობლივი პროექტები. ჩვენთან საინფორმაციო ტექნოლოგიების სკოლაც შეიქმნა,  დღეს ძალიან პოპულარულია ტექნოლოგიების მიმართულება, ველოდებით აკრედიტაციის მიღებას კომპიუტერული მეცნიერებების მიმართულებით. არსებული პროგრამები უფრო მრავალფეროვანი გახდა. „ალტე უნივერსიტეტის“ ბაზაზე შექმნილია Start-up გარაჟი, სადაც სტუდენტებსა და კურსდამთავრებულებს აქვთ შესაძლებლობა საკუთარი ბიზნეს იდეები რეალობად აქციონ.

ვცდილობთ, მოვიპოვთ საერთაშორისო რეიტინგებიც. პროცესი მიდის იმაზე უკეთესად, ვიდრე ვგეგმავდით და კმაყოფილები ვართ, თუმცა მუშაობა გრძელდება და წინ კიდევ ბევრი საქმე გვაქვს. ვფიქრობ, უნივერსიტეტი კონკურენტულია, მართალია „ალტე უნივერსიტეტი“ ბაზარზე როგორც ახალი ბრენდი შემოვიდა და ამან შარშანდელ წელზე ეფექტი იქონია, თუმცა წელს ვიმედოვნებ, რომ უფრო დიდი რაოდენობის სტუდენტს მივიღებთ. უცხოელების მხრიდან დაინტერესება საკმაოდ მაღალია, დაახლოებით 40% უცხოელი სტუდენტები არიან“, — აღნიშნავს რამაზ კუკულაძე.