თბილისის მერიამ, ვაკის რაიონში უნივერსიტეტის ქუჩის რეაბილიტაციაზე ტენდერი გამოაცხადა.
როგორც სახელმწიფო შესყიდვების სააგენტოს ვებ-გვერდზე განთავსებულ ინფორმაციიდან ხდება ცნობილი შესყიდვის სავარაუდო ღირებულება 17 221 286 ლარია.
შესყიდვა 12 აპრილს გამოცხადდა, წინადადებების მღება 10 მაისს დაიწყება და 15 მაისს დასრულდება.
მიწოდების ვადად განსაზღვრულია პროექტის-ხელშეკრულების ძალაში შესვლიდან 45 კალენდარული (ექსპერტიზის მომსახურების ვადის ჩათვლით), სამშენებლო სამუშაოების-წერილობითი დავალების მიცემიდან 145 კალენდარული დღე.
სამუშაოს შესრულების საგარანტიო ვადა სამუშაოების დასრულებიდან 3 წელია
დოკუმენტაციას თანდართული აქვს საზოგადოებრივი ტრანსპორტის ინტენსივობის სქემავ, რომლის მიხედვითაც არსებული მდგომარეობით უნივერსიტეტის ქუჩაზე (ანჯაფარიძის ქუჩის გზაჯვარედინიდან ახალ სპორტის სასახლემდე) დღის პერიოდში ერთი მიმართულებით გაივლის 12 მეტრიანი ავტობუსი -350-ჯერ. 8 მეტრიანი ავტობუსი - 70-ჯერ და მიკროავტობუსები - 112-ჯერ.
საპროექტო მოცემულობით კი იგეგმება, რომ აღნიშნულ მონაკვეთზე გაივლის შესახსრული ავტობუსები (18-19მ) – 600-ჯერ. 12 მეტრიანი ავტობუსები -200-ჯერ. 8 მეტრიანი ავტობუსები - 200-ჯერ. მიკროავტობუსები 40-ჯერ. ასევე ნათქვამია ისიც, რომ სამომავლოდ 24-25 მეტრის სიგრძის ორსახსრიანი ავტობუსების ექსპლუატაცია იქნას გათვალისწინებული, დღის მანძილზე ერთი მიმართულებით 350-ჯერ.
ახალი სპორტის სასახლის ტერიტორიიდან მიხეილ თამარაშვილის ქუჩის გზაჯვარედინამდე კი არსებული მდგომარეობით 8 მეტრიანი ავტობუსები დადიან 64-ჯერ. საპროექტო მოცემულობით კი იგეგმება რომ 12-მეტრიანი ავტობუსები ივლიან 100-ჯერ.
ტექნიკურ დოკუმენტაციაში ნათქვამია, რომ პროექტანტმა შესაბამისი გაანგარიშების საფუძველზე, შპს „თბილსერვის ჯგუფი“-თან შეთანხმებით, უნდა გაითვალისწინოს ახალი სანიაღვრე ქსელის მოწყობა. ასევე სავალი ნაწილის ქვეშ შესაძლოა განთავსებული იყოს ძველი გაუქმებული კომუნიკაციების ქსელები, რომლის არსებობის შემთხვევაშიც, მიმწოდებელმა უნდა მოახდინოს მათი დემონტაჟი და გატანა დამკვეთის მიერ მითითებულ ტერიტორიაზე.
გზის ორივე მხარეს არსებული ტროტუარების სიგანეები უნდა დაპროექტდეს წარმოდგენილი დიზაინის შესაბამისად და არსებული სიტუაციიდან გამომდინარე. ასევე, ტროტუარის გასწვრივ უნდა მოეწყოს თაროიანი ბეტონის ბორდიურები, ტროტუარის საფარის ქვეშ გათვალისწინებული უნდა იყოს სხვადასხვა მიწისქვეშა კომუნიკაციებისთვის კაბელ არხების მოწყობა.
მომსახურების მიწოდება ასევე, მიზნად ისახავს საპროექტო გზის გასწვრივ ფერდის დამჭერი საყრდენი კედლების მოწყობა-რეაბილიტაციას.
მიმწოდებელი ვალდებულია წარმოდგენილი დიზაინის შესაბამისად დააპროექტოს საზოგადო ტრანსპორტის გასაჩერებელი ადგილები და გამყოფი კუნძულები, რომელიც უნდა მოპირკეთდეს ბუნებრივი ქვით. დიზაინი და სახეობა უნდა შეთანხმდეს დამკვეთთან. საზოგადო ტრანსპორტის გასაჩერებელი ადგილები უნდა მოეწყოს არმირებული ცემენტობეტონის საფარით. საპროექტო გზაზე აუცილებელია შეზღუდული შესაძლებლობის მქონე (შშმ) პირთათვის ადაპტირებული გადასასვლელების და ტროტუარების მოწყობა.