„ჩვენ თვითონ დავზარალდით და ფაქტის წინაშე დაგვაყენა ავიაკომპანიამ, რომ ერთ სანტიმეტრსაც აღარ გვაპატიებდა, ფასები გაძვირდებოდა და დაითვლებოდა სიზუსტით და ეს ყველაფერი გავიგეთ მეილით,“ - ასე ეხმაურება Usa2Georgia ბოლო დღეებში კომპანიის გარშემო განვითარებულ მოვლენებსა და მომხმარებელთა ნაწილის უკმაყოფილებას.

„კომერსანტს“ კომპანიაში ექსკლუზიურად განუცხადეს, რომ USA2GEORGIA გარემო პირობებიდან გამომდინარე იძულებული გახდა ხელშეკრულების პირობები შეეცვალა და მომხმარებლისთვის განახლებული შეთავაზება გაეკეთებინა.

როგორც „კომერსანტს“ კომპანიაში უთხრეს, ოქტომბრის ბოლოს გადამზიდავმა ავიაკომპანიებმა, რომლებიც IATA- ს წევრები არიან, USA2GEORGIA -ს აცნობეს, რომ ტარიფების დაანგარიშება მოხდებოდა IATA-ს არსებული რეგულაციით და ამიერიდან არც ერთ კგ-ს და სმ-ს USA2GEORGIA -ს აღარ აპატიებდნენ.

„ერთი თვით ადრე დავიწყეთ გაფრთხილებები სხვადასხვა პლატფორმის მეშვეობით: დაიგზავნა სმს-ები, დაიწერა საინფორმაციო ბლოგი, მომხმარებლებთან  დავგზავნეთ მეილები. თუმცა როგორც ვხედავთ სამწუხაროდ ეს არასაკმარისი აღმოჩნდა. რისი საშუალებაც გვქონდა ყველა გზა გამოვიყენეთ, თუმცა მომხმარებლების ნაწილს ჩვენს მიერ გაგზავნილი შეტყობინებები არ წაუკითხავს.

მოქალაქეებს მივაწოდეთ ინფორმაცია ცვლილებების შესახებ, რომელიც შედიოდა ხელშეკრულებაში, რომ ამანათების გადაზიდვა მხოლოდ სასწორის წონით ვეღარ მოხდებოდა და რომ მისი დაანგარიშება უნდა მოხდეს მოცულობით, როგორც ეს არის საერთაშორისო სტანდარტი და სწორედ ამ სტანდარტით მოქმედებს ყველა ავიაკომპანია თუ გადამზიდავი. თუ როგორ ხდება სატვირთო გადაზიდვების ფასების დაანგარიშება გაწერილია IATA-ს მიერ და სწორედ იქ წერია, რომ მოცულობის დასადგენად, ზოგადი წესია ტვირთის მოცულობის გაყოფა კუბ/მ-ის 6 000-ზე.

კიდევ ერთი საკითხია გადაფუთვა. USA2GEORGIA ამერიკის მისამართზე მიტანილი ამანათების გადაფუთვას უფასოდ ახდენდა, ანუ დიდი ზომის საფოსტო ამანათებს შლიდა და მცირე ზომად ფუთავდა, ეს კი ფასს მომხმარებლისთვის მნიშვნელოვნად ამცირებდა. მომსახურება აქამდე უფასო იყო, თუმცა დიდი ხარჯების გამო კომპანიამ ასეთ მომსახურებაზე თვითღირებულება დააწესა - თითო ამანათისთვის 2 აშშ დოლარი.

„დღეს რეალობა გაქვს ასეთი: იმდენად გაიზარდა ტვირთების მოცულობითი წონები, გაიზარდა ამანათების რაოდენობა, რომ ავიაკომპანიები ცდომილებაზე თვალს აღარ ხუჭავენ. ამერიკაში 4-5-ჯერ გაიზარდა მომსახურების ფასები, - გამოვიდა ისე, რომ კომპანიას აღარ ჰქონდა  რესურსი, რომ გადაფუთვის სერვისი უფასოდ შეგვენარჩუნებინა. მაშინ საერთოდ უნდა გაგვეჩერებინა მუშაობა. ამის ნაცვლად ჩვენ მომხმარებლებს თითოეულ ამანათზე და არა თითოეულ ნივთზე, რომელიც ამ შეფუთვაში დევს, შევთავაზეთ გადაფუთვის მომსახურება, რომლის ტარიფადაც დავაწესეთ 2 დოლარი. ეს თანხა მხოლოდ იმისთვისაა საკმარისი, რომ ამერიკაში პერსონალი დავიქირაოთ, რადგანაც არსებული ამანათების გადაფუთვას ათეულობით ადამიანი სჭირდება. 11 წლის განმავლობაში გადაფუთვის მომსახურებას ჩვენ გავწევდით სრულიად უფასოდ. საუბარია ყველა ამანათზე. თუმცა შეუძლებელია სამუდამოდ უფასოდ გასწიოს, რომელიმე კომპანიამ ესა თუ ის მომსახურება. ზოგმა ჩვენი შეთავაზება გადაფუთვის შესახებ და ხელშეკრულება წაიკითხა, ზოგმა არ წაიკითხა, მაგრამ ისე დააჭირა და დაეთანხმა.

გადაფუთვის მომსახურება არის ნებაყოფლობითი. თუ მომხმარებელი გადაფუთვის მომსახურებას არ აირჩევს, მაშინ მას მოუწევს ტვირთის მოცულობითი წონის საფასურის გადახდა“, აცხადებენ USA2GEORGIA -ში.

თუ ამანათი ყუთში დევს მომხმარებელი ყველა შემთხვევაში მოცულობითი წონის საფასურს იხდის, პოლიეთილენის პარკით მიღებული ამანათები კი ყოველთვის წონით ითვლება. გადაფუთვა საშუალებას იძლევა, რომ რამდენჯერმე შემცირდეს მოცულობით ღირებულება. მაგალითად ფეხსაცმლის ყუთი 1.5კგ-ს აღწევს მოცულობით საშუალოდ, თუმცა საფოსტო ყუთი შესაძლოა 9კგ-იანი ჰქონდეს და გადაფუთვა ამ ეკონომიას მისცემს მომხმარებელს.

რატომ მოყვა ცვლილებებს უკმაყოფილო მომხმარებლების ბრალდებები? - USA2GEORGIA -ში ამბობენ, რომ კომუნიკაცია უნდა ყოფილიყო მეტი, მომხმარებლების ინფორმირება კი უფრო ინტენსიური.

კომპანიის წარმომადგენელი ამბობს, რომ გარდა იმ პლატფორმებისა, რომლის საშუალებითაც მომხმარებელს ხელშეკრულების ცვლილების შესახებ ინფორმაცია მიეწოდა, სხვა დამატებითი სარეკლამო კამპანიის ჩატარება კომპანიას არსებული ფინანსური რესურსებით არ შეეძლო.

„ალბათ ჯობდა, რომ ცვლილების შესახებ ინფორმაცია ყველა ბილბორდზე გაგვეტანა ან ტვ-ს საშუალებით გამოგვეცხადებინა, მაგრამ ჩვენ არ ვართ ისეთი დიდი კომპანია, რომელსაც  ასეთ მიმართულებით დიდი თანხის ხარჯვის ფუფუნება აქვს. მომსახურების სერვისში მოგება 10-15%-ია და ამ ამ თანხაზეა დამოკიდებული ჩვენი 100-ზე მეტი თანამშრომელი და არსებული ფილიალები. შეგახსენებთ, რომ USA2GEORGIA-ც მოცულობითი წონით იხდის გადაზიდვის ღირებულებას “, - აცხადებენ USA2GEORGIA -ში.

კომპანიაში ამბობენ, რომ მას შემდეგ რაც ხელშეკრულებაში ცვლილებების შესახებ მომხმარებლებს აცნობეს, იმავდროულად ამოქმედდა შერჩევითი ფასდაკლების სერვისიც, რათა მომხმარებლებს ტვირთი ერთბაშად არ გაზრდოდათ.

„ლოიალური დამოკიდებულებით მივუდექით და შევთავაზეთ, შერჩევითი, 20%-იანი ფასდაკლება. ვიფიქრეთ , რომ არსებული რეზერვების გათვალისწინებით მომხმარებლისთვის დეკემბრის განმავლობაში 20%-იანი ფასდაკლება შეგვეთავაზებინა“, განმარტავს „კომერსანტთან“ USA2GEORGIA -ს წარმომადგენელი.